Putin nima uchun boshqa yetakchilardan ko‘ra Erdo‘g‘on bilan tez-tez muloqot qilishi ma’lum bo‘ldi

Rossiya prezidenti Vladimir Putin Germaniya kansleri Olaf Shols va Fransiya yetakchisi Emmanuel Makrondan ko‘ra turkiyalik hamkasbi Rajab Toyyib Erdo‘g‘on bilan tez-tez muloqot qilishiga sabab Anqaraning pozitsiyasidir, dedi Putinning matbuot kotibi Dmitriy Peskov “RBK”ga.

“Anqaraning pozitsiyasi Parij va Berlinnikidan farq qiladi. Anqara vositachilik sa’y-harakatlarini davom ettirishga tayyorligini ma’lum qilmoqda. Prezident Putin esa Turkiyaning bu harakatlarini bir necha bor olqishlagan”, — dedi Peskov.

Bundan tashqari, Peskov Rossiya Turkiya bilan “juda keng savdo-iqtisodiy aloqalarga ega” ekani, mamlakatlar turli yirik loyihalarni amalga oshirayotganini ta’kidladi.

“Bularning barchasi davlat rahbarlarining bir-biri bilan tez-tez muloqot qilishi uchun sababdir”, — deb tushuntirdi Kreml matbuot kotibi.

Peskovning so‘zlariga ko‘ra, Makron va Shols “so‘nggi paytlarda u yoki bu tarzda Rossiya tomonining pozitsiyasiga quloq solishni”, shuningdek, vositachilik harakatlarida ishtirok etishni istamagan, shuning uchun “ular bilan muloqot kam”.

Kreml saytidagi xabarlarga ko‘ra, Ukrainada urush boshlanganidan beri Putin va Erdo‘g‘on o‘n martacha telefonda gaplashgan va to‘rt marta uchrashgan. Oxirgi uchrashuv Osiyoda hamkorlik va ishonch chora-tadbirlari bo‘yicha kengash sammiti doirasida Ostonada bo‘lib o‘tdi. Putin Makronga 13 marta, Sholsga esa o‘ndan ortiq qo‘ng‘iroq qilgan. Biroq Putin Rossiya bosqini boshlanganidan beri na Fransiya prezidentini, na Germaniya kansleri bilan ko‘rishmagan.