Ukraina yalpi safarbarlik e’lon qilishni rejalashtirmoqda. Bu haqda mahalliy nashrlar Ukraina Mudofaa vazirligiga tayanib xabar bermoqda. Kiyev Rossiyada e’lon qilingan qisman safarbarlik tufayli, frontda Rossiya armiyasi son jihatdan ustun kelishidan xavfsiramoqda.
Xabarda aytilishicha, Ukrainada umumiy safarbarlik 24-fevraldayoq e’lon qilingan bo‘lsa-da, yangi bo‘linmalarni tashkil qilish va qurollantirish bo‘yicha cheklangan imkoniyatlarni hisobga olganda, yalpi safarbarlikka ehtiyoj bo‘lmagan — ammo endi vaziyat o‘zgarmoqda.
Avvalroq Kiyev to‘ldirish markazi boshlig‘i Maksimov Ukraina qo‘shinlarini to‘ldirishga ehtiyoj borligini, shu sababli hamma joyda harbiy majburiyatga ega erkaklarning barchasiga chaqiriq qog‘ozi topshirilishini aytgandi.
Rossiyada qisman safarbarlik 21-sentabr kuni e’lon qilindi va 300 ming kishi armiyaga chaqilishi ma’lum qilindi. 14-oktabr kuni allaqachon 222 ming safarbar etilgani haqida xabar berildi.
Ukrainada safarbarlik va harbiy holat
Ukrainaning butun hududi bo‘ylab harbiy holat Rossiya maxsus operatsiyasi boshlanganidan keyin darhol, 24-fevral kuni tongda kiritilgan edi. Bu qaror haqida e’lon qilayotib, Ukraina prezidenti Vladimir Zelenskiy fuqarolarni xotirjamlikni saqlashga va uyda qolishga chaqirgandi. U aholini Ukraina “xavfsizlik va mudofaa sektori to‘liq” ishlashda davom etishiga ishontirgandi.Zelenskiy umumiy safarbarlik to‘g‘risidagi farmonni ham imzoladi.
Rejim 30 kun muddatga joriy qilingan, ammo mart o‘rtalarida Zelenskiy uni yana bir oyga uzaytirishni taklif qilgandi. O‘shanda Oliy rada davlat rahbari 20-martda imzolagan qonun loyihasini ma’qullagandi. Aprelda Zelenskiy xuddi shunday tashabbus bilan parlamentga murojaat qilgan, Oliy rada harbiy holatni 25-mayga qadar uzaytirgan edi. 23-may kuni Ukraina Oliy radasi butun mamlakat hududida harbiy holatni uch oyga uzaytirish to‘g‘risidagi qonunni qabul qildi.
15-avgust kuni Oliy rada harbiy holatni yana 90 kunga — 2022-yil 21-noyabrgacha uzaytirishni ma’qulladi, shuningdek, umumiy safarbarlik o‘tkazish muddatini uzaytirish to‘g‘risidagi farmonni ham tasdiqladi.
Harbiy holat amal qiladigan davrda Ukraina hukumati komendantlik soati e’lon qilishi, kirish va chiqish bo‘yicha maxsus rejim o‘rnatishi, fuqarolar, chet elliklar va fuqaroligi bo‘lmagan shaxslarning harakatlanish erkinligini cheklashi, shuningdek, transport harakatini cheklashi mumkin. Bundan tashqari, mamlakatda ba’zi siyosiy partiyalar faoliyati taqiqlanishi yoki boshqa choralar qo‘llanilishi ham mumkin..
Izoh (0)