Buyuk Britaniya Mudofaa vazirligi 24-oktabr kuni o‘z kundalik hisobotini Rossiya Ukrainadagi urushda foydalanayotgan Eron dronlariga bag‘ishladi, deb yozmoqda Meduza.
Hisobotda aytilishicha, Ukraina tezligi uncha yuqori bo‘lmagan, shovqinli va past balandlikda uchadigan ushbu kamikadze dronlariga qarshi kurashda tobora muvaffaqiyat qozonmoqda, bu esa dronlarni odatiy havo mudofaasi tizimlarining nishoniga aylantirmoqda.
Buyuk Britaniya Mudofaa vazirligi, xususan, Ukraina prezidenti Vladimir Zelenskiyning dronlar yordamida qilingan hujumlarning 85 foizi qaytarilayotgani haqidagi bayonotiga tayangan.
Rossiya aftidan, Eron dronlarini uzoq masofaga uchadigan va yuqori aniqlikdagi qurollar o‘rniga qo‘llamoqda, chunki Rossiyaning o‘zida bunday qurollar tobora kamayib bormoqda, deyiladi Buyuk Britaniya Mudofaa vazirligi bayonotida.
Britaniya Mudofaa vazirligining hisob-kitoblari Ukraina Mudofaa vazirligi Bosh razvedka boshqarmasi boshlig‘i Kirill Budanovning “Ukrainskaya pravda”ga bergan intervyusida dronlarni urib tushirish haqida aytgan ma’lumotlaridan biroz farq qilmoqda. Unga ko‘ra, Rossiya qo‘shinlari tomonidan uchirilgan dronlarning 30 foizi nishongacha yetib bormoqda.
Budanov, shuningdek, Ukraina razvedkasi ma’lumotlariga ko‘ra, Rossiya Erondan 1700 ta dron sotib olganini aytdi. Har biri 300 dona drondan iborat ikkita partiya qabul qilib olingan. Budanovning so‘zlariga ko‘ra, hozir Rossiya ikkinchi partiyani ishlatmoqda.
Ukraina va G‘arb mamlakatlari Rossiya qo‘shinlari Erondan sotib olingan va Rossiyada “Geran-2” deb qayta deb nomlangan Shahed-136 kamikadze dronlaridan foydalanayotganiga ishonadi. Eron va Rossiya buni rasman rad etmoqda. Yevropa Ittifoqi va Buyuk Britaniya ulardagi ma’lumotlarga ko‘ra, Rossiya bilan kelishuv tuzish va rus harbiylarini dronlardan foydalanishga o‘qitishda ishtirok etgan Eron harbiylari va dron ishlab chiqaruvchilarga qarshi sanksiya qo‘lladi.
Izoh (0)