“Garri Potter” filmidagi Hagrid roli orqali dunyo bo‘ylab muxlislarni topgan aktyor Robbi Koltreyn 14-oktabr kuni 72 yoshida vafot etdi. Bu xabarni nafaqat tomoshabinlar, balki “Garri Potter” filmida u bilan suratga tushgan aktyor va aktrisalar chuqur qayg‘u bilan qarshi oldi. Ushbu film sabab Robbi Koltreyn bilan yaqin insonlarga aylangan mashhurlar aktyor bilan bog‘liq xotiralarini muxlislari bilan bo‘lishdi.
“Garri Potter” asari muallifi — Joan Rouling
“Men Robbiga o‘xshagan insonni hech qachon uchratmaganman. U ajoyib iste’dod egasi va butunlay boshqacha inson edi. Men uni, uning ishini bilish va u bilan birga kulish baxtiga muyassar bo‘ldim”, — deydi yozuvchi.
Garri Potter — Deniyel Redkliff
“Robbi men uchratgan eng hazilkash insonlardan biri edi va bolaligimizda suratga olish maydonchasida bizni doim kuldirardi. Ayniqsa “Garri Potter va Azkaban mahbusi” filmini suratga olish chog‘ida Hagridning kulbasida yomg‘irdan uzoq vaqt berkinib turganimizda kayfiyatimizni qanday ko‘targanini, kayfiyatimizni ko‘tarish uchun hikoya va hazillar aytib berganini eslayman. Men u bilan uchrashish va u bilan ishlash baxtiga muyassar bo‘ldim, uning endi oramizda yo‘qligi men uchun qayg‘uli holat. U juda mahoratli aktyor va ajoyib inson edi”, — deb yozadi Deniyel Redkliff.
Germiona — Emma Uotson
“Uning iste’dodi shu qadar ulkan ediki, ulkan inson rolini o‘ynaganida ham ma’no bor — u o‘zining yorqinligi bilan har qanday bo‘shliqni to‘ldira olar edi. Robbi, qachondir men ham suratga olish maydonchasida menga mehribon bo‘lganingiz kabi mehribon bo‘laman, va’da beraman, buni sizning xotirangizga atab qilaman. Bilingki, men sizni juda yaxshi ko‘raman va hurmat qilaman. Sizning mehribonchilingizni, taxalluslaringizni, iliqligingizni, kulgilaringizni va quchoqlashingizni juda sog‘inaman. Siz bizni bir oila qildingiz. Bilingki, siz biz uchun shunday bo‘lgansiz. Hagriddan yaxshirog‘i bo‘lmagan,” — deb xotiralari bilan bo‘lishdi aktrisa Emma Uotson.
Ron Uizli — Rupert Grint
“Men sigara va soqol yelimining hidini hech qachon unutmayman — bu ajoyib kombinatsiya. Dunyoda boshqa hech kim Hagridni o‘ynay olmadi. Faqat Robbi. U xuddi kitoblar va filmlardagi kabi edi: iliq, rahmdil va quvnoq. O‘nlab yillar o‘tib ham bizga g‘amxo‘rlik qilishda davom etgan ulkan yurakli odam”, — deb yozdi Rupert Grint Instagram’dagi sahifasida.
Jeyms Felps — Fred Uizli
“Quyosh ostida har qanday mavzudagi tasodifiy suhbatlarni sog‘inaman. 2000-yilning sentabrini hech qachon unutmayman, Robbi Koltreyn 14 yoshimda meni tashvishga solayotgan suratga olish maydonchasidagi birinchi kunimda yonimga kelib: ‘Bu ishdan rohatlaning, shunda hammasi joyida bo‘ladi’,— dedi. Buning uchun unga rahmat”, — deydi aktyor.
“Garri Potter” filmining boshqa aktyorlari ham Robbi Koltreyn kabi insonlar Yerda ming yilda bir marta tug‘ilishini ta’kidlab, qayg‘uda ekanini aytishdi. Shuningdek, aktyorning ko‘plab hamkasblari u bilan bog‘liq xotiralari haqida muxlislariga gapirdi.
Mavzuga doir:
- “Garri Potter” filmidagi Hagrid roli bilan tanilgan aktyor Robbi Koltreyn vafot etdi.
- Saraton, bitlash, qovurg‘a sinishi. “Garri Potter” filmining aktyor va aktrisalari suratga olish maydonchasida duch kelgan qiyinchiliklar.
- Garri Potter — Deniel Redkliff aktyorlikni tark etib, rejissorlikda o‘zini sinab ko‘rmoqchi.
- Faqat Emma Uotson, Deniel Redkliff yoki Rupert Grint emas: “Garri Potter”dagi aktyor bolalar qanchalik o‘zgargan?
Izoh (0)