Zohid Risqiyev o‘ziga kelganidan so‘ng jinoiy javobgarlikka tortiladi — Ichki ishlar vazirligi tergov departamenti
29-sentabr kuni poytaxtning Yunusobod tumanida taxminan soat 23:00 da “Ummon” guruhining sobiq a’zosi Zohid Risqiyev ishtirokidagi mudhish yo‘l-transport hodisasi yuz bergan edi. Xonanda BMW avtomashinasini Ahmad Donish ko‘chasidan Yangishahar ko‘chasiga qarab haydab ketayotganida boshqaruvni yo‘qotgan. Oqibatda tan jarohatlari olgan Zohid, uning ikki do‘sti kasalxonaga yotqizilgan va uning 1994-yilda tug‘ilgan Sunnat ismli yana bir do‘sti voqea joyida vafot etgan. Zo‘r TV telekanalining “Yurakdan gapiramiz” ko‘rsatuvida ikki haftadan beri komada bo‘lgan Zohid Risqiyev bilan sodir bo‘lgan avtohalokat tufayli jinoiy ish qo‘zg‘atilgani va u o‘ziga kelganidan so‘ng jinoiy javobgarlikka tortilishi haqida ma’lumot berildi.
“29-sentabr kuni taniqli shaxs bilan avtohalokat sodir bo‘lgan. Kim bo‘lishidan qat’i nazar, qonun-qoidalarga amal qilib harakatlanishi kerak. Bu holatda dastlabki tergov harakatlari olib borilmoqda, javobgarlik esa uning oqibatidan ko‘rib chiqib belgilanadi. Hodisa jarayonini ko‘zdan kechirish jarayonida chizma ham chiziladi va undagi har bir detallar qayd etiladi. Ushbu yo‘l-transport hodisasini ko‘zdan kechirish jarayonida chizilgan chizmada tormozlanish izlari ham mavjud. Yuqoridan Ahmad Donish ko‘chasi bo‘ylab harakatlanishdan so‘ng o‘ngga, Yangi Shahar ko‘chasiga burilish lozim bo‘lgan.
Zohid bu holatda tezlikning yuqori bo‘lganligi sababli taxminlarga ko‘ra burilishga ulgurmagan. 15 metr tormozlanish izlaridan so‘ng chorrahani chegaralab turuvchi to‘siqqa urilgan. U yerdan so‘ng qarama-qarshi to‘siqqa ham urilgan. Undan keyin aylanib temir panjaraga borib urilgan. Hodisa sodir bo‘lgan joyda bir nafar shaxs vafot etgan. Yuqori tezlik sabab shu holat sodir bo‘lgan. Hozir ekspertiza tayinlangan, ekspertlar aniq aytib bera olmaydi, sabab tormozlanish izlari uzilgan.
Haydovchi yo‘l-transport hodisasi paytida og‘ir tan jarohati olgan va birinchi, ikkinchi koma holatida bo‘lganligi sababli tergov yoki boshqa ekspertiza holatidan o‘tkazilmagan. Biroq shifoxonaga borgandan so‘ng qon namunasi olinadi va alkogolga topshiriladi. Uch kun o‘tgandan keyin shifoxonaga bordim, holat bo‘yicha tibbiy ma’lumotlarni olib bo‘lmadi, xuddi shu holat bo‘yicha analiz javoblari kelgani yo‘q edi. Undan tashqari bu tergov jarayonida aniq bo‘ladi. Yo‘lovchilar bilan tergov ishlari olib borildi, tergov o‘tkazilmadi, sabab ular ham tan jarohati olgan edi.
Mazkur holat bo‘yicha O‘zbekiston Respublikasi Jinoyat kodeksining 266-moddasining ikkinchi qismi (yo‘l harakati xavfsizlik qoidasini buzgan holda odam vafot etishiga sabab bo‘lishi) bilan nazarda tutilgan jinoyat ishi qo‘zg‘atildi. Uning tibbiy holati bo‘yicha ekspertiza tayinlanadi. Ekspertizadagi holati agar javobgarlikka loyiq deb topilsa, albatta masala ko‘rib chiqiladi. Holat yuzasidan jinoyat ishi qo‘zg‘atilgan, aybdor shaxs komada bo‘lgani sababli shaxsga nisbatan jinoyat ishi qo‘zg‘atiladi. Tergov jarayonlarida shaxs o‘ziga kelmasa jinoiy javobgarlikka javob beradigan holatda bo‘lmasa, unda jinoyat ishi vaqtinchalik to‘xtatiladi. Bu olti oy yoki bir yil muddatga bo‘lishi mumkin.
Barcha tergov harakatlari tugab, aybdor aniq, barcha so‘roq harakatlari, ekspertiza xulosalari chiqib, jinoyat ishi qo‘zg‘atilgan, ayblash uchun asosli deb topilgandan keyin ayb e’lon qilinadi. Bu holatda aybdor shaxs Jinoyat kodeksining 266-moddasining ikkinchi qismi (yo‘l harakati xavfsizlik qoidasini buzgan holda odam vafot etishiga sabab bo‘lishi) ga ko‘ra 7 yilgacha ozodlikdan va haydovchilik guvohnomasidan 3 yilgacha mahrum qilinadi”, — deydi Ichki ishlar vazirligi tergov departamenti tergovchisi Ijodbek Nishonov.
Mavzuga doir:
- Instagram: Komadan chiqa olmayotgan Zohid Risqiyev, Mitti vaynerning Kia avtomobilini pachoq qilishdi, Zarina Yo‘ldosheva avariyaga uchradi.
- Instagram: Munisa Rizayevaning onasiga sovg‘asi, davomi suratga olinayotgan “Osmondagi bolalar”, Zohid Risqiyev o‘ziga keldimi?
- Instagram: Zohid bilan avariyaga uchragan do‘sti aloqaga chiqdi, Manzurani hamkasblari ranjitishdi, Toshkentdagi to‘yda xizmatda bo‘lgan rossiyalik mashhurlar.
- Instagram: Zohid Risqiyevning ahvoli qanday? Yangi mashinali bo‘lgan Xoliqjon vayner, Nilufar Usmonova xonadonidagi bayram.
