Зоҳид Рисқиев ўзига келганидан сўнг жиноий жавобгарликка тортилади — Ички ишлар вазирлиги тергов департаменти
29 сентябрь куни пойтахтнинг Юнусобод туманида тахминан соат 23:00 да «Уммон» гуруҳининг собиқ аъзоси Зоҳид Рисқиев иштирокидаги мудҳиш йўл-транспорт ҳодисаси юз берган эди. Хонанда BMW автомашинасини Аҳмад Дониш кўчасидан Янгишаҳар кўчасига қараб ҳайдаб кетаётганида бошқарувни йўқотган. Оқибатда тан жароҳатлари олган Зоҳид, унинг икки дўсти касалхонага ётқизилган ва унинг 1994 йилда туғилган Суннат исмли яна бир дўсти воқеа жойида вафот этган. Zo‘r TV телеканалининг «Юракдан гапирамиз» кўрсатувида икки ҳафтадан бери комада бўлган Зоҳид Рисқиев билан содир бўлган автоҳалокат туфайли жиноий иш қўзғатилгани ва у ўзига келганидан сўнг жиноий жавобгарликка тортилиши ҳақида маълумот берилди.
«29 сентябрь куни таниқли шахс билан автоҳалокат содир бўлган. Ким бўлишидан қатъи назар, қонун-қоидаларга амал қилиб ҳаракатланиши керак. Бу ҳолатда дастлабки тергов ҳаракатлари олиб борилмоқда, жавобгарлик эса унинг оқибатидан кўриб чиқиб белгиланади. Ҳодиса жараёнини кўздан кечириш жараёнида чизма ҳам чизилади ва ундаги ҳар бир деталлар қайд этилади. Ушбу йўл-транспорт ҳодисасини кўздан кечириш жараёнида чизилган чизмада тормозланиш излари ҳам мавжуд. Юқоридан Аҳмад Дониш кўчаси бўйлаб ҳаракатланишдан сўнг ўнгга, Янги Шаҳар кўчасига бурилиш лозим бўлган.
Зоҳид бу ҳолатда тезликнинг юқори бўлганлиги сабабли тахминларга кўра бурилишга улгурмаган. 15 метр тормозланиш изларидан сўнг чорраҳани чегаралаб турувчи тўсиққа урилган. У ердан сўнг қарама-қарши тўсиққа ҳам урилган. Ундан кейин айланиб темир панжарага бориб урилган. Ҳодиса содир бўлган жойда бир нафар шахс вафот этган. Юқори тезлик сабаб шу ҳолат содир бўлган. Ҳозир экспертиза тайинланган, экспертлар аниқ айтиб бера олмайди, сабаб тормозланиш излари узилган.
Ҳайдовчи йўл-транспорт ҳодисаси пайтида оғир тан жароҳати олган ва биринчи, иккинчи кома ҳолатида бўлганлиги сабабли тергов ёки бошқа экспертиза ҳолатидан ўтказилмаган. Бироқ шифохонага боргандан сўнг қон намунаси олинади ва алкоголга топширилади. Уч кун ўтгандан кейин шифохонага бордим, ҳолат бўйича тиббий маълумотларни олиб бўлмади, худди шу ҳолат бўйича анализ жавоблари келгани йўқ эди. Ундан ташқари бу тергов жараёнида аниқ бўлади. Йўловчилар билан тергов ишлари олиб борилди, тергов ўтказилмади, сабаб улар ҳам тан жароҳати олган эди.
Мазкур ҳолат бўйича Ўзбекистон Республикаси Жиноят кодексининг 266-моддасининг иккинчи қисми (йўл ҳаракати хавфсизлик қоидасини бузган ҳолда одам вафот этишига сабаб бўлиши) билан назарда тутилган жиноят иши қўзғатилди. Унинг тиббий ҳолати бўйича экспертиза тайинланади. Экспертизадаги ҳолати агар жавобгарликка лойиқ деб топилса, албатта масала кўриб чиқилади. Ҳолат юзасидан жиноят иши қўзғатилган, айбдор шахс комада бўлгани сабабли шахсга нисбатан жиноят иши қўзғатилади. Тергов жараёнларида шахс ўзига келмаса жиноий жавобгарликка жавоб берадиган ҳолатда бўлмаса, унда жиноят иши вақтинчалик тўхтатилади. Бу олти ой ёки бир йил муддатга бўлиши мумкин.
Барча тергов ҳаракатлари тугаб, айбдор аниқ, барча сўроқ ҳаракатлари, экспертиза хулосалари чиқиб, жиноят иши қўзғатилган, айблаш учун асосли деб топилгандан кейин айб эълон қилинади. Бу ҳолатда айбдор шахс Жиноят кодексининг 266-моддасининг иккинчи қисми (йўл ҳаракати хавфсизлик қоидасини бузган ҳолда одам вафот этишига сабаб бўлиши) га кўра 7 йилгача озодликдан ва ҳайдовчилик гувоҳномасидан 3 йилгача маҳрум қилинади», — дейди Ички ишлар вазирлиги тергов департаменти терговчиси Ижодбек Нишонов.
Мавзуга доир:
- Instagram: Комадан чиқа олмаётган Зоҳид Рисқиев, Митти вайнернинг Kia автомобилини пачоқ қилишди, Зарина Йўлдошева аварияга учради.
- Instagram: Муниса Ризаеванинг онасига совғаси, давоми суратга олинаётган «Осмондаги болалар», Зоҳид Рисқиев ўзига келдими?
- Instagram: Зоҳид билан аварияга учраган дўсти алоқага чиқди, Манзурани ҳамкасблари ранжитишди, Тошкентдаги тўйда хизматда бўлган россиялик машҳурлар.
- Instagram: Зоҳид Рисқиевнинг аҳволи қандай? Янги машинали бўлган Холиқжон вайнер, Нилуфар Усмонова хонадонидаги байрам.
