“Xodimlar o‘zboshimchalik bilan qoidalarni buzgan” — Qashqadaryoda elektromontyor tok urishidan vafot etgani yuzasidan rasmiy ma’lumot berildi

Qashqadaryo viloyatining G‘uzor tumanida elektromontyor tok urishi oqibatida vafot etgani haqida xabar berilgan edi. “Hududiy elektr tarmoqlari” hodisa o‘zboshimchalik bilan qoidalarni buzish oqibatida yuz berganini bildirdi.

Ma’lum bo‘lishicha, 5-oktabr kuni “Qashqadaryo HETK” AJ “G‘uzor TETK” tezkor chiqish brigadasi tomonidan 110/35/10 kVli “G‘armiston” PSdan chiquvchi 10 kVli “G‘uzor-Sovbog‘” fiderining “Mikop” shoxobchasi avariyadan so‘ng ko‘rikdan o‘tkazilgan. Shundan so‘ng soat 14:30 atrofida fiderga kuchlanish berilgan.

Biroq tezkor brigada xodimlari naryaddan tashqari, o‘zboshimchalik bilan mavjud qoidalarni buzgan holda 110/10 kVli “G‘uzor” PSdan chiquvchi 10 kVli “Oxunboboyev” fiderining 36-tayanchidan iste’molchi balansida bo‘lgan tayanchga o‘tadigan simlarni yechishga uringan vaqtda elektromontyor G‘.B. kuchlanish ostiga tushgan.

Tezkor brigada tomonidan jabrlangan G‘.B. tayanchdan tushirib olinib, unga birinchi yordam ko‘rsatilgan hamda tez yordamga xabar berilgan. Yetib kelgan tez yordam shifokorlari kuchlanish ostiga tushgan elektromontyorni ko‘rikdan o‘tkazganda, uning vafot etgani ma’lum bo‘lgan.

Qayd etilishicha, mazkur holat yuzasidan kuni kecha “Hududiy elektr tarmoqlari” AJ rahbariyati tomonidan ishchi guruh tuzilib, ayni paytda Qashqadaryo viloyatida mazkur hodisaning sabablari atroflicha o‘rganilmoqda.