Shimoliy Koreya Donbass, Xerson va Zaporojye viloyatlarining Rossiyaga qo‘shilishini qo‘llab-quvvatladi

Shimoliy Koreya Donetsk va Lugansk xalq respublikalari, Zaporojye va Xerson viloyatlarining Rossiya tarkibiga qo‘shilishini qo‘llab-quvvatlaydi. Bu haqda KXDR Tashqi ishlar vazirligi xalqaro tashkilotlar departamenti rahbari Cho Chxol Su ma’lum qildi, deb yozadi “RBK”.

Uning so‘zlariga ko‘ra, ushbu hududlardagi referendumlar BMT ustaviga muvofiq qonuniy tarzda o‘tkazilgan. Biroq AQSH o‘z ustuvorligini saqlab qolish uchun “bosqinchilarga xos qo‘sh standartlar”ga amal qilmoqda, deya qo‘shib qo‘ydi u AQSHning Kiyev jangovar harakatlar chog‘ida qo‘ldan boy bergan hududlardagi referendumlarni qoralovchi rezolyutsiyasini izohlar ekan.

“Rad qilib bo‘lmaydigan ‘bir qutbli dunyo’ni saqlab qolish uchun, AQSH mustaqil mamlakatlarning ichki ishlariga aralashmoqda va ularning qonuniy huquqlarini buzmoqda, bu bilan esa BMT Xavfsizlik kengashini suiiste’mol qilmoqda”, — dedi Cho Chxol Su.

DXR, LXR hukumatlari hamda Xerson va Zaporojye viloyatlari harbiy-fuqarolik ma’muriyatlari rahbarlari 23—27-sentabr kunlari Rossiyaga qo‘shilish haqida referendumlar o‘tkazdi. 30-sentabr kuni Vladimir Putin ushbu hududlar rahbariyatlari bilan ularning mamlakat tarkibiga kirishi haqida shartnomalar imzoladi.

Ukraina prezidenti Vladimir Zelenskiy mamlakatni Putin boshqarar ekan, Rossiya tomoni bilan muzokaralardan bosh tortishini ma’lum qildi. Avvalroq esa u Kiyev qo‘ldan boy berilgan hududlarni qaytarib olishini va’da qilgandi.

AQSH, Kanada, Buyuk Britaniya, Turkiya, Yevroittifoq mamlakatlari ikki respublika va ikki viloyatning Rossiyaga qo‘shilishini tan olishdan bosh tortdi. Ularning fikricha, bunday qadam xalqaro huquq me’yorlariga ziddir.