Ukraina Rossiya ustidan Xalqaro sudga murojaat qildi

Ukraina Rossiyaning hududlarni anneksiya qilishga urinishlari bo‘yicha ishni mohiyatan ko‘rib chiqish iltimosi bilan Xalqaro sudga murojaat qildi. Bu haqda Ukraina tashqi ishlar vaziri Dmitriy Kulebaning tvitiga asoslanib, “RBK-Ukraina” xabar bermoqda.

“Putinning anneksiya qilishga urinishlaridan so‘ng Ukraina Xalqaro sudga bu harakat 16-martda chiqarilgan vaqtinchalik choralar to‘g‘risidagi qonuniy majburiy buyruqni qo‘pol ravishda buzish ekanini rasman ma’lum qildi. Biz suddan ishni mohiyatan darhol ko‘rib chiqishni so‘raymiz”, — deydi Kuleba.

Avvalroq Rossiya prezidenti Vladimir Putin Rossiya tomonidan vaqtincha bosib olingan Zaporojye va Xerson viloyatlarining mustaqilligini tan olgandi.

Referendumlar

Rossiya tarkibiga kirish haqidagi referendumlarda ovoz berish 27-sentabr kuni yakunlandi. 28-sentabr kuni ertalab Donbass saylov komissiyalari ovozlarning 100 foizi ko‘rib chiqilganidan keyin referendumlar natijalarini e’lon qildi. Ularning aytishicha, LXR saylovchilarining 98,42 foizi, DXR elektoratining 99,23 foizi, Zaporojye va Xerson viloyatlari bosib olingan hududlari aholisining esa tegishli ravishda 93,1 foizi va 87,05 foizi Rossiya tarkibiga qo‘shilishni yoqlab ovoz bergan.

Referendumlar boshlanishidan oldinoq Putin Rossiya Donbass, shuningdek, ikki viloyat fuqarolarining yakuniy qarorini qo‘llab-quvvatlashini aytgandi.

AQSH va Yevroittifoq esa referendum natijalarini tan olmasligini ma’lum qilgan va u o‘tkazilgan taqdirda, Rossiyaga qarshi yangi sanksiyalar kiritish bilan tahdid qilgandi. Shuningdek, Serbiya va Turkiya ham ovoz berish yakunlarini tan olmasligini bildirgan.

Kanada bosh vaziri referendumlar tufayli Rossiyaga qarshi yangi sanksiyalar kiritilishini e’lon qildi. Zelenskiy esa referendumlar tan olinsa, Putin bilan muzokaralar o‘tkazmasligini aytdi.

Mavzuga doir:

• Erdo‘g‘on Putin bilan Ukraina hududlarida o‘tkazilgan “referendumlar” masalasini muhokama qilmoqchi
• LXR va Xerson viloyati rahbarlari Putinga murojaat qilib, Rossiya tarkibiga qabul qilishni so‘radi
• Rossiya BMT Xavfsizlik kengashida “referendum”ni qoralovchi rezolyutsiya loyihasiga veto qo‘ydi. Xitoy ovoz berishda betaraf qoldi
• “Ukraina NATOga darhol a’zo bo‘lish uchun bugunoq ariza topshiradi” — Zelenskiy NATOga qo‘shilish arizasini imzoladi (video)