Шимолий Корея Донецк ва Луганск халқ республикалари, Запорожье ва Херсон вилоятларининг Россия таркибига қўшилишини қўллаб-қувватлайди. Бу ҳақда КХДР Ташқи ишлар вазирлиги халқаро ташкилотлар департаменти раҳбари Чо Чхол Су маълум қилди, деб ёзади «РБК».
Унинг сўзларига кўра, ушбу ҳудудлардаги референдумлар БМТ уставига мувофиқ қонуний тарзда ўтказилган. Бироқ АҚШ ўз устуворлигини сақлаб қолиш учун «босқинчиларга хос қўш стандартлар»га амал қилмоқда, дея қўшиб қўйди у АҚШнинг Киев жанговар ҳаракатлар чоғида қўлдан бой берган ҳудудлардаги референдумларни қораловчи резолюциясини изоҳлар экан.
«Рад қилиб бўлмайдиган ‘бир қутбли дунйўни сақлаб қолиш учун, АҚШ мустақил мамлакатларнинг ички ишларига аралашмоқда ва уларнинг қонуний ҳуқуқларини бузмоқда, бу билан эса БМТ Хавфсизлик кенгашини суиистеъмол қилмоқда», — деди Чо Чхол Су.
ДХР, ЛХР ҳукуматлари ҳамда Херсон ва Запорожье вилоятлари ҳарбий-фуқаролик маъмуриятлари раҳбарлари 23—27 сентябрь кунлари Россияга қўшилиш ҳақида референдумлар ўтказди. 30 сентябрь куни Владимир Путин ушбу ҳудудлар раҳбариятлари билан уларнинг мамлакат таркибига кириши ҳақида шартномалар имзолади.
Украина президенти Владимир Зеленский мамлакатни Путин бошқарар экан, Россия томони билан музокаралардан бош тортишини маълум қилди. Аввалроқ эса у Киев қўлдан бой берилган ҳудудларни қайтариб олишини ваъда қилганди.
АҚШ, Канада, Буюк Британия, Туркия, Евроиттифоқ мамлакатлари икки республика ва икки вилоятнинг Россияга қўшилишини тан олишдан бош тортди. Уларнинг фикрича, бундай қадам халқаро ҳуқуқ меъёрларига зиддир.
Изоҳ (0)