Germaniya Mudofaa vazirligi: Kiyevning NATOga kirish haqidagi arizasi alyansning barcha a’zolari tomonidan muhokama qilinadi

Germaniya mudofaa vaziri Kristina Lambrextning aytishicha, Ukrainaning NATOga qo‘shilish haqidagi so‘rovi Shimoliy Atlantika alyansining barcha a’zolari bilan muhokama qilinadi.

“Ukraina unda o‘zini erkin his qiladigan ittifoqni o‘zi tanlaydi. Ushbu so‘rov mamnuniyat bilan qabul qilinmoqda. Biroq mazkur masala bo‘yicha 30 ta davlat ovoz berishi kerak, bu birgina Germaniyaning qarori emas. Ukrainadagi vaziyatni ham hisobga olish kerak”, — dedi Lambrext Kishinyovda moldovalik hamkasbi Anatoliy Nosatiy bilan qo‘shma brifing chog‘ida.

Ukraina prezidenti Vladimir Zelenskiy mamlakat hududlarining Rossiya tomonidan anneksiya qilinishi fonida tezlashtirilgan tartibda NATOga a’zo bo‘lish uchun ariza topshirdi. Uning so‘zlariga ko‘ra, Kiyev va NATO allaqachon “de-fakto ittifoqchilar”, ammo bu maqom hujjatlashtirilishi kerak. Jarayon davomida Ukraina o‘zi uchun xavfsizlik kafolatlari bo‘yicha muzokaralar olib borish niyatida.

NATO bosh kotibi Yens Stoltenberg Ukrainaning alyansga qo‘shilish haqidagi arizasiga izoh berar ekan, NATOga a’zolik to‘g‘risidagi qaror 30 davlatning barchasi tomonidan qabul qilinishi kerakligini, hozirda alyans Ukrainaga Rossiyaning shafqatsiz bosqinidan o‘zini himoya qilish uchun tezkor yordam berishga e’tibor qaratayotganini aytdi.

Oq uy jarayonni boshqa vaqtda muhokama qilish kerak, deb hisoblamoqda.