Qonunchilik palatasi deputati Rasul Kusherbayevning Telegram’dagi kanalida Buxoro harbiy prokurori Javhar Sobirov topshirig‘i bilan qimmatbaho daraxtlar kesib tashlangani haqida murojaat e’lon qilindi. Bosh prokuror matbuot kotibi Hayot Shamsutdinov holatga munosabat bildirdi.
Murojaatda aytilishicha, prokuror 2022-yil may oyida Buxoro harbiy prokuraturasi ma’muriy binosi orqa hovlisidagi oshxona bilan issiqxona o‘rtasidagi 6 tup ko‘p yillik “Aylanta” daraxtlarini kestirib tashlagan.
Bundan tashqari, uning topshirig‘i bilan orqa hovlidagi tomorqa noqonuniy ravishda devor bilan o‘ralib, daraxt, tok butalarga jiddiy shikast yetkazilgan. 2022-yil may—iyun oylarida tomorqa ichidagi 3 dona ko‘p yillik o‘rik daraxti va 3 tup tok butasi quritilgan. Keyin prokuror ularni ham kestirib tashlagan.
Rasul Kusherbayev esa “ekologlarimiz qonunbuzar prokurorga ham chora ko‘ra olishadimi?” deya savol qo‘ymoqda.
Prokuratura izohi
Bosh prokuratura matbuot xizmati rahbari Hayot Shamsutdinov vaziyatga munosabat bildirdi. Uning ma’lum qilishicha, mazkur holat Respublika Harbiy prokuraturasi tomonidan tekshirilmoqda.Ekoqo‘mita ne deydi?
Davlat ekologiya qo‘mitasi joriy yilning 16-sentabrida Prokuratura organlari tomonidan ichki tekshiruv o‘tkazilganini bildirgan. Tekshiruv jarayonida harbiy prokuratura hududidagi umumiy ovqatlanish binosi atrofida o‘rik daraxtining shoxlari hamda kam qimmatli bo‘lgan 1 tup o‘rik va 6 tup aylant daraxtlari tag qismidan tegishli ruxsatnomasiz kesilgani aniqlangan.“Ushbu holat yuzasidan ekologiya inspektorlari ishtirokida tegishli hujjatlar rasmiylashtirildi”, — deyiladi xabarda.
Izoh (0)