Vazirlar Mahkamasi qarori bilan “Yashil bog‘lar” nizomi tasdiqlandi. Bu haqda Telegram’dagi “Huquqiy axborot” kanali xabar bermoqda.
Nizomga ko‘ra, quyidagilar “Yashil bog‘lar”ni barpo etish bo‘yicha hokimliklarga tashabbus bilan chiqish huquqiga ega:
- davlat organlari va tashkilotlari;
- fuqarolarning o‘zini o‘zi boshqarish organlari;
- ko‘p kvartirali uy-joylar mulkdorlari.
Takliflar mahalliy ijro etuvchi hokimiyat organlari tomonidan har yili 15-maygacha tegishli qaror qabul qilish uchun xalq deputatlari mahalliy kengashlari muhokamasiga kiritiladi.
Xalq deputatlari mahalliy kengashlari tomonidan ijobiy qaror qabul qilingan taqdirda, “Yashil bog‘lar”ni barpo etish uchun “Yashil hudud” davlat unitar korxonasi bilan kelgusi yilning 20-yanvariga qadar shartnomalar tuziladi. “Yashil bog‘lar”ga ko‘chat ekish tadbirlari har yili bahor va kuz mavsumlarida amalga oshiriladi.
Izoh (0)