Yaponiyaning Rossiyadagi konsuli hibsga olindi

Rossiya Federal xavfsizlik xizmati Yaponiyaning Vladivostokdagi bosh konsulligi xodimi Motoka Tatsunori hibsga olingani haqida ma’lum qildi, deya xabar beradi Meduza.

Xavfsizlik xizmati ma’lumotlariga ko‘ra, konsul “pul evaziga Rossiyaning Osiyo-Tinch okeani mintaqasi davlatlaridan biri bilan hamkorligining dolzarb jihatlari, G‘arb sanksiyalarining Primorsk o‘lkasidagi iqtisodiy vaziyatga ta’siri to‘g‘risidagi maxfiy ma’lumotni olayotganda hibsga olingan.

Tatsunori persona non grata deb e’lon qilindi. Yaponiya esa diplomatik kanallar orqali norozilik bildirdi, deydi Rossiya Federal xavfsizlik xizmati.

Agentlik shuningdek, Tatsunori so‘roq qilingani aks etgan videoni ham e’lon qildi. U Rossiya qonunchiligini buzganini “tushunganini” aytib, maxfiy ma’lumotlarni pul evaziga qo‘l kiritishga harakat qilganini tan oladi.