Toshkent hokimini prezident maqtagan bo‘lsa, qashqadaryolik hokimlar tanqid qilindi, qoraqalpoq yigiti esa yosh qizga kuch ishlatdi: “Daryo”da dayjest
Yakunlanayotgan hafta avvalida Qashqadaryodagi bog‘chaning 50 nafar tarbiyalanuvchisi ovqatdan zaharlangan bo‘lsa, Buxoroda maktab sinfxonasining shifti qulab tushdi. Toshkentda esa prezident Shavkat Mirziyoyev raisligida bo‘lib o‘tgan videoselektorda 14 nafar tuman hokimi ishdan olinib, ularga uch oylik sinov muddati belgilandi. “Daryo” har doimgidek hafta yakunida hududlarda ro‘y bergan eng shov-shuvli voqealarni esga oladi.
“Daryo”ning Namangan viloyatidagi muxbiri Azizbek Abduvaliyevning ma’lumot berishicha, 14-sentabrdan boshlab Namangandagi avtomobillarga gaz quyish shoxobchalarida narxlar pasayishi kuzatilgan. Viloyatdagi avtomobillarga metan gaz to‘ldirish shoxobchalarida o‘rtacha narx 2800 so‘mni tashkil etgan bo‘lsa, hozirga kelib hududdagi mavjud 115 ta metan gaz zapravkalarining 15 dan ortig‘ida bu ko‘rsatkich 2600 so‘mgacha pasaygan.
O‘tayotgan hafta, shuningdek, hokimlar bilan bog‘liq shov-shuvli voqealarga boy hafta bo‘ldi.
Hafta boshida prezident Shavkat Mirziyoyev raisligida turizm masalalariga bag‘ishlangan videoselektor yig‘ilishi bo‘lib o‘tdi. Unda respublikada faoliyat yurituvchi hokimlarning 14 nafari sohadagi kamchiliklari sabab ishdan olinib, ularga uch oylik sinov muddati berildi. Videoselektorda turizm vaziri Aziz Abduhakimov, moliya vaziri Timur Ishmetov, Soliq qo‘mitasi raisi Sherzod Kudbiyev va Bojxona qo‘mitasi raisi Akmalxo‘ja Mavlonov qat’iy ogohlantirildi. Qolaversa, “O‘zbekiston temir yo‘llari” raisi Husnutdin Hosilov uch oyda tizimida o‘zgarish qilmasa, ishdan olinishi ma’lum qilindi.
Mazkur tanqiddan xulosa qilgan hokimlar — Namangan viloyatining To‘raqo‘rg‘on va Kosonsoy, Samarqand viloyatining Urgut tumani hokimi “Daryo” so‘roviga javoban tanqiddan qilingan xulosalari hamda uch oy muddatda davlat rahbari, tuman aholisi ishonchini oqlash uchun nimalar qilmoqchiligini gapirib berdi.
Biroq, Qashqadaryoning Yakkabog‘, Kasbi va Qamashi tumani hokimlari OAV, xususan “Daryo”ning bu haqdagi so‘rovini ochiq qoldirdi. Ular jurnalistning “Turizmni rivojlantirish borasidagi qaysi kamchiligim uchun prezident tanqidiga uchradim deb o‘ylaysiz?”, “Berilgan uch oylik muddatda nimalar qilib, davlat rahbari va tuman aholisi ishonchiga erishaman deb rejalashtiryapsiz?”, — deya bergan savollariga javob berolmadi.
Jamoatchilikka avvaliga 311 million so‘mga Captiva xarid qilishi bilan, so‘ngra viloyatning sobiq hokimi Zafar Ro‘ziyevga “tosh otishi” bilan tanilgan Yakkabog‘ tumani hokimi Lutfiddin Abdullayev “Daryo” muxbiri bilan telefon orqali qilingan dastlabki muloqotida savollarni eshitdi. Savollarni tinglab bo‘lgach, yonida mehmonlari borligini aytib, birozdan so‘ng qaytib qo‘ng‘iroq qilishini bildirdi. Lekin va’da qilingan paytda na qo‘ng‘iroq qildi va na takroriy qo‘ng‘iroqlarga javob berdi.
Qamashi tumani hokimi Botir Tog‘ayev ham jurnalistni aldagan. U jurnalist bilan telefon orqali muloqotida savollarni tinglagan. Ammo matbuot kotibi orqali savollarni avvalroq olganini aytib, 20-sentyabr kuni kechki paytgacha har ikkala savolga ham yozma javob berishini aytgan. Biroq hokim savollarga o‘sha paytning o‘zida javob bermagani yetmaganidek, shunchaki va’da berish, yolg‘on gapirish bilan kifoyalangan.
2021-yil prezident Shavkat Mirziyoyev tanqidiga uchrab, viloyatdagi sektor rahbarlari kafilligida zo‘rg‘a lavozimida qolgan Kasbi tumani hokimi To‘xtamurod Meyliyev esa OAV vakili bilan muloqot qilishni ham istamagan. To‘g‘rirog‘i, OAV vakili savollaridan qochgan. Avvaliga matbuot kotibi Laziz Temirov orqali, so‘ngra Jamol ismli yordamchisi orqali savollarni tinglagan janob Meyliyev OAV so‘roviga bepisand munosabatda bo‘lib, javob berishni o‘ziga ep ko‘rmagan.
Qashqadaryoning sobiq hokimi 2021-yilning noyabr oyidan beri Toshkent viloyatiga rahbarlik qilib kelayotgan Zoir Mirzayev prezident Shavkat Mirziyoyevning maqtoviga erishib, Xalq deputatlari viloyat kengashining navbatdagi sessiyasida viloyatning doimiy hokimi sifatida tasdiqlandi.
Vaqtincha rahbar vazifasini bajarib turgan Qoraqalpog‘iston Jo‘qorg‘i Kengesi raisi Amanbay O‘rinbayev esa tanqidiy chiqishlarini davom ettirib, bu safar To‘rtko‘l tumani mas’ullarini “savalagan”.
“Daryo” o‘z o‘quvchilariga eng shov-shuvli voqealarni ulashishda davom etadi.
