Bugun,

  • USD 11014.01
  • RUB 191.8
  • EUR 10674.78

Prezident Shavkat Mirziyoyev raisligida 2022-yilning 19-sentabr kuni bo‘lib o‘tgan ichki va tashqi turizm salohiyatini yanada oshirish chora-tadbirlari haqidagi videoselektorda bir necha hokimlar ishi tanqid qilinib, 14 nafari ishdan olingandi. Ularga uch oylik muddat berilib, xato kamchiliklaridan xulosa chiqarishlari kerakligi qo‘shimcha qilindi. Shundan so‘ng Samarqand viloyatining Urgut tumani hokimi, Namangan viloyatining To‘raqo‘rg‘on va Kosonsoy tumani hokimlari OAV orqali chiqish qilib, tanqiddan qilingan xulosasini, shuningdek, uch oylik sinov muddatida qaysi ishlarni amalga oshirib, xatosini tuzatmoqchi ekani haqida axborot berdi.

“Daryo” mazkur masala yuzasidan so‘rovini davom ettirib, prezident tanqidiga duchor bo‘lgan qashqadaryolik hokimlar — Kasbi, Qamashi, Shahrisabz va Yakkabog‘ tumani rahbarlariga murojaat qildi. Va atigi 2 ta savol berdi. Muxbir hokimlarga turizmni rivojlantirish borasidagi qaysi kamchiligim uchun prezident tanqidiga uchradim deb o‘ylaysiz? Berilgan uch oylik muddatda nimalar qilib, davlat rahbari va tuman aholisi ishonchiga erishaman deb rejalashtiryapsiz?, — deya savol berdi.

Yakkabog‘ tumani hokimi Lutfiddin Abdullayev.

Yakkabog‘ tumani hokimi Lutfiddin Abdullayev.
Foto: Yakkabog‘ tumani hokimligi

Jamoatchilikka avvaliga 311 million so‘mga Captiva xarid qilishi bilan, so‘ngra viloyatning sobiq hokimi Zafar Ro‘ziyevga “tosh otishi” bilan tanilgan Yakkabog‘ tumani hokimi Lutfiddin Abdullayev “Daryo” muxbiri bilan telefon orqali qilingan dastlabki muloqotida savollarni eshitdi. Savollarni tinglab bo‘lgach, yonida mehmonlari borligini aytib, birozdan so‘ng qaytib qo‘ng‘iroq qilishini bildirdi. Lekin va’da qilingan paytda na qo‘ng‘iroq qildi va na takroriy qo‘ng‘iroqlarga javob berdi.

Hokimning matbuot kotibi Sherzod Hasanov “Daryo” so‘roviga javoban jurnalist so‘rovi haqida hokimga ma’lum qilganini, biroq hokim bu so‘rovga tayinli javob bermaganini bildirdi.

Hozir hokim bilan shu masalada yana gaplashdim. Mazkur masala yuzasidan hokim farmoyishi chiqarilib, ishchi guruh tuzilar ekan. Va belgilangan muddatda rejalashtirilgan ishlar bajariladi”, — deydi hokim va OAV vakili o‘rtasida qolganini sezgan va so‘rovga tayinli javob berolmaganini payqagan tuman hokimligi axborot xizmati rahbari Sherzod Hasanov.
“Daryo” muxbiri bilan muloqot qilgan Qamashi tumani hokimi Botir Tog‘ayev ham jurnalistni aldadi.

Qamashi tumani hokimi Botir Tog‘ayev.

Qamashi tumani hokimi Botir Tog‘ayev.
Foto: Qashqadaryo viloyat hokimligi

Muloqot davomida savollarni tinglagan hokim matbuot kotibi orqali savollarni avvalroq olganini aytib, “bugun (20-sentabr — “Daryo” izohi) kechki paytgacha har ikkala savolingizga ham yozma javob beramiz”, — dedi. Biroq savollarga o‘sha paytning o‘zida javob bermagani yetmaganidek, shunchaki va’da berish, yolg‘on gapirish bilan kifoyalandi.

OAV vakilini aldagan hokimning matbuot kotibi Nurbek Rasulov OAV so‘rovining to‘rt kunlab javobsiz qolishini izohlar ekan “Bu yerda siz bilmagan narsalar ham bor, bunga vaqt kerak”, dedi. Ammo jurnalist bilmaydigan ma’lumotni oshkor etmadi.

2021-yil prezident Shavkat Mirziyoyev tanqidiga uchrab, viloyatdagi sektor rahbarlari kafilligida zo‘rg‘a lavozimida qolgan Kasbi tumani hokimi To‘xtamurod Meyliyev OAV vakili bilan muloqot qilishni ham istamadi. To‘g‘rirog‘i, OAV vakili savollaridan qochdi. Avvaliga matbuot kotibi Laziz Temirov orqali, so‘ngra Jamol ismli yordamchisi orqali savollarni tinglagan janob Meyliyev OAV so‘roviga bepisand munosabatda bo‘lib, javob berishni o‘ziga ep ko‘rmadi.

Kasbi tumani hokimi To‘xtamurod Meyliyev.

Kasbi tumani hokimi To‘xtamurod Meyliyev.
Foto: “Daryo”

Mazkur holat haqida fikr bildirgan AOKAning viloyat boshqarmasi boshlig‘i Usmon Nusurov Qamashi, Kasbi va Yakkabog‘ hokimlarining OAV so‘roviga javob bermasligini kutmaganini, mazkur hokimlarning matbuot kotiblari bilan bog‘lanib, vaziyatga aniqlik kiritishini aytgan bo‘lsa, bloger Kapitan Karimov hokimliklarning matbuot kotiblarini bo‘sh ishlaganlikda aybladi.

“Hokimlar bilan to‘g‘ridan to‘g‘ri muloqot qilolmaydigan matbuot kotiblar yaxshisi joyini bo‘shatib qo‘ygani ma’qul”, — deydi bloger Kapitan Karimov.

Bu yerda hokimliklarning matbuot kotiblari juda bo‘sh ishlabdi. Aslida “Daryo” ularga minbar beribdi-ku. Jurnalistlar bilan ishlash ko‘nikmasiga ega matbuot kotibi vaziyatdan foydalanib, hokim xulosasi va kelajakda tumanda turizm bo‘yicha nima qilinishi kerakligi haqida batafsil ma’lumot berib, ishini ko‘rsatib olmaydimi? Axborot siyosati bo‘yicha hokim maslahatchisi maqomiga ega inson mas’uliyatni ham his qilishi va shu mas’uliyatiga yarasha harakat qilishi ham kerak-da. Lallayib o‘tirish bilan ish bitmaydi-ku. Matbuot kotib aslida OAV va hokim o‘rtasidagi muloqotchi ekanini, jurnalist so‘roviga o‘z vaqtida javob berilishi kerakligini hatto hokimga ham tushuntira olishi kerak”, — deydi bloger Kapitan Karimov.
Kapitan Karimovning qo‘shimcha qilishicha, OAV vakillari va hokimliklar o‘rtasida muloqotni ta’minlay olmayotgan matbuot kotiblariga AOKA tegishli chora ham ko‘rishi kerak.
Shunday paytlarda nega AOKA mas’ullari jim turibdi? Nega paysalga solmoqda? Nega matbuot kotibiga dangal savol qo‘yib, vazifasini bajarmaganiga izoh so‘ramayapti? Agar AOKA shunaqa lattachaynarlikda davom etsa, biz OAVga ochiq hokimlar borasida xalq kutgan, prezident kutgan natijaga erisholmaymiz”, — deydi bloger.
“Daryo” voqealar rivojini kuzatishda davom etadi.

Izoh
Asosiy yangiliklar
Dunyo
Kreml Putin tug‘ilgan kunini qanday nishonlamoqchiligini ma’lum qildi
Sport
Superligada sentabr oyining eng yaxshi murabbiyi aniqlandi
Mahalliy
Farg‘onada 64 yoshli qaynota kelinini o‘ldirib, marhumaning boshini uzib oldi