MIB xorijga chiquvchi fuqarolar uchun qarzni aeroportning o‘zida to‘lash va taqiqni yechish imkoniyatini yo‘lga qo‘ydi
Toshkent xalqaro aeroportida fuqarolarda qarzdorlik sababli yuzaga kelgan taqiqlar masalasiga aniqlik kiritish va ularni yechish, shuningdek, elektron to‘lov tizimlari orqali qarzdorliklarni bartaraf etish maqsadida MIBning maxsus interaktiv xizmatlar shoxobchasi tashkil qilindi.
MIB matbuot xizmatining “Daryo”ga ma’lum qilishicha, ushbu shoxobchada xizmat ko‘rsatayotgan xodimlar orqali qarzdorlik tufayli taqiq bor yoki yo‘qligini bilib olish va qarzdorlikni shu zahoti ushbu saytda elektron to‘lov tizimlari orqali amalga ham oshirish mumkin.
“Hozirda fuqarolarimizning talablariga ko‘ra, shoxobchaga infokioska ham o‘rnatilmoqda, bu esa fuqarolarimizning naqd pulda ham to‘lovni amalga oshirish imkonini yaratadi.
Shoxobcha faoliyatini boshlaganiga 3 kun bo‘ldi, bir kunda shoxobchaga 50 dan ortiq fuqarolar murojaatlari bo‘yicha taqiq masalalariga aniqlik kiritilmoqda, o‘z vaqtida to‘lanmay qolgan qarzdorliklar evaziga 30 million so‘mdan ortiq mablag‘lar elektron tarzda qabul qilindi”, — deyiladi xabarda.
Qayd etilshicha, O‘zbekistonning boshqa aeroportlarda ham fuqarolarda taqiqlar masalasida muammolar yuzaga kelganida markazlashgan tartibda masalani o‘rganish va hal etish uchun maxsus telefon raqami (95-411-07-17) joriy qilingan. Fuqarolar ushbu raqam orqali yoki aeroport mas’ul xodimlariga orqali Toshkent xalqaro aeroportidagi interaktiv shoxobcha bilan bog‘lanadi.
Ma’lumot uchun, fuqarolarning sud va boshqa organ hujjatlariga muvofiq belgilangan qarzdorlikning o‘z vaqtida to‘lamasligi oqibatida Respublika hududida chiqish huquqi cheklanishi mumkin. Haqiqatan ham aliment to‘lash uchun javobgar shaxs bo‘lgan va turmush o‘rtog‘idan sud tomonidan maxsus ruxsatnomaga ega bo‘lmagan yo‘lovchining aliment to‘lash bo‘yicha qarzi bo‘lmagan taqdirda ham chet elga chiqishi taqiqlanadi.
