Qashqadaryoda jarima maydonchasiga qo‘yilgan Nexia bir necha soatdan keyin yonib ketdi

Qashqadaryoning Qamashi tumanida jarima maydonchasiga qo‘yilgan Nexia yonib ketdi.

Mashina egasi E.B.ning ma’lum qilishicha, 6-avgust kuni YPX inspektori tomonidan qarzdorlik uchun avtomashina to‘xtatilib, tuman markazidagi jarima maydoniga joylashtirilgan. Oradan bir necha soat o‘tgandan keyin avtomashinada yong‘in chiqib, yonib ketgan.

“Jarima maydoniga borsam, mashinadan asar ham yo‘q. Yonib, kul bo‘lgan. Sababi esa aniq emas. Metan ballondan bo‘lgan desam, metan ballonga hech narsa qilmagan. Mashinaning texnik holati soz edi. O‘z-o‘zidan yonib ketishi mumkin emas”, — degan haydovchi.

Viloyat IIB matbuot xizmati xabarida aytilishicha, hodisa joyiga tuman FVB xodimlari chiqib, holatni o‘rganganda, yong‘in avtomashinaning old kapot qismidan kelib chiqqanini ko‘rsatilgan.

Qamashi tuman IIB Navbatchilik qismiga 6-avgust kuni soat 13:30 larda kelib tushgan xabarga ko‘ra, tumanning “Qovchin” MFYda joylashgan “Texnika to‘plam” MCHJ hovlisida E.B.ga tegishli Nexia turgan joyida yonib ketgani ma’lum qilingan.

Shu sababli yong‘in o‘chog‘ini aniqlash maqsadida 8-avgust kuni yong‘in sodir bo‘lgan joydan olingan elektr simi va kul namunlari Adliya vazirligi qoshidagi Hadicha Sulaymonova nomidagi sud-ekspertiza markaziga ekspertizadan o‘tkazish uchun yuborilgan.

Sud ekspertiza markazining xulosasida hodisa sodir bo‘lgan joydan olingan yong‘in qoldiqlarida neft maxsulotlari va tez yonuvchi suyuqliklar izlari mavjud emasligi ko‘rsatib o‘tilgan.

Shu sababli mashina qasddan yoqib yuborish holatlari aniqlanmagani sababli yetkazilgan zararni undirish bo‘yicha fuqaro E.B.ga sug‘urta tashkilotiga murojaat qilishi va “Texnika to‘plam” MCHJ bilan bog‘liq harakatlari fuqarolik munosabatlari ekanligini inobatga olib, Fuqarolik ishlari bo‘yicha sudga murojaat qilishi tushuntirilgan.