Yelizaveta II ning vafotidan keyin hindistonliklar “Ko‘hinur” olmosini qaytarishni talab qildi

Ijtimoiy tarmoqlarning hind segmentida Buyuk Britaniya qirolichasi Yelizaveta II ning vafotidan keyin 105 karatli dunyoga mashhur “Ko‘hinur” olmosini Dehliga qaytarish haqida faol muhokamalar boshlandi, deb yozadi “Mk.ru”. U, yana boshqa 2,8 mingta qimmatbaho tosh bilan bir qatorda Britaniya imperiyasi tojiga qadalgan.

Ushbu olmos hozirgi Hindistonning Andxra-Pradesh shtati hududida XII—XIV asrlarda qazib olingan. Unga XVI asrda Boburiylar sulolasi egalik qilgan, so‘ng uni forslar, keyinroq esa afg‘onlar qo‘lga kiritgan. Biroz vaqt o‘tgach, u Hindistonga qaytarilgan va Panjobning qo‘shib olinishi chog‘ida britaniyaliklar tomonidan sotib olingan.

Ost-Indiya kompaniyasi 1840-yillarda olmosni sotib olib, qirolicha Viktoriyaga sovg‘a qilgan. 1937-yilda qayta ishlov berilganidan keyin olmos qirolichaning tojiga qadalgan. O‘shandan buyon tosh Britaniya qirolligining qimmatbaho buyumlari qatoriga kiradi. Ammo Eron, Afg‘oniston, Pokiston va Hindiston hukumatlari ushbu olmosga nisbatan o‘z huquqlarini e’lon qilgan.

Hindistonliklar ijtimoiy tarmoqlarda norozilik bildirishicha, olmos “o‘lim, ochlik va o‘g‘irliklar” orqali o‘z boyligini yaratgan britaniyaliklar tomonidan o‘marib ketilgan. Hindiston 1947-yilda mustaqillikka erishganidan keyin va Yelizaveta II ga toj kiydirish chog‘ida ham olmosni qaytarishni talab qilgan. Biroq qirollik saroyi bu talabni e’tiborsiz qoldirgan.

Buyuk Britaniya qirolichasi Yelizaveta II 8-sentabr kuni 96 yoshida vafot etdi. U mamlakatni 70 yil davomida boshqardi.

Qirolicha o‘zining Shotlandiyadagi Balmoral qasrida hayotdan ko‘z yumdi. Uning jasadi Londonga 15-sentabr kuni keltirildi va Vestminster saroyiga joylashtirildi, xohlovchilar qirolicha bilan vidolashishi mumkin.

Yelizaveta II ning tobuti Vestminsterda 19-sentabrgacha qoladi. Qirolicha shu kuni Vestminster abbatligiga dafn qilinadi.