Ижтимоий тармоқларнинг ҳинд сегментида Буюк Британия қироличаси Елизавета II нинг вафотидан кейин 105 каратли дунёга машҳур «Кўҳинур» олмосини Деҳлига қайтариш ҳақида фаол муҳокамалар бошланди, деб ёзади «Mk.ru». У, яна бошқа 2,8 мингта қимматбаҳо тош билан бир қаторда Британия империяси тожига қадалган.
Ушбу олмос ҳозирги Ҳиндистоннинг Андхра-Прадеш штати ҳудудида XII—XIV асрларда қазиб олинган. Унга XVI асрда Бобурийлар сулоласи эгалик қилган, сўнг уни форслар, кейинроқ эса афғонлар қўлга киритган. Бироз вақт ўтгач, у Ҳиндистонга қайтарилган ва Панжобнинг қўшиб олиниши чоғида британияликлар томонидан сотиб олинган.
Ост-Индия компанияси 1840 йилларда олмосни сотиб олиб, қиролича Викторияга совға қилган. 1937 йилда қайта ишлов берилганидан кейин олмос қироличанинг тожига қадалган. Ўшандан буён тош Британия қироллигининг қимматбаҳо буюмлари қаторига киради. Аммо Эрон, Афғонистон, Покистон ва Ҳиндистон ҳукуматлари ушбу олмосга нисбатан ўз ҳуқуқларини эълон қилган.
Ҳиндистонликлар ижтимоий тармоқларда норозилик билдиришича, олмос «ўлим, очлик ва ўғирликлар» орқали ўз бойлигини яратган британияликлар томонидан ўмариб кетилган. Ҳиндистон 1947 йилда мустақилликка эришганидан кейин ва Елизавета II га тож кийдириш чоғида ҳам олмосни қайтаришни талаб қилган. Бироқ қироллик саройи бу талабни эътиборсиз қолдирган.
Буюк Британия қироличаси Елизавета II 8 сентябрь куни 96 ёшида вафот этди. У мамлакатни 70 йил давомида бошқарди.
Қиролича ўзининг Шотландиядаги Балморал қасрида ҳаётдан кўз юмди. Унинг жасади Лондонга 15 сентябрь куни келтирилди ва Вестминстер саройига жойлаштирилди, хоҳловчилар қиролича билан видолашиши мумкин.
Елизавета II нинг тобути Вестминстерда 19 сентябргача қолади. Қиролича шу куни Вестминстер аббатлигига дафн қилинади.
Изоҳ (0)