Fransiyaning Le Figaro nashri Shanxay Hamkorlik Tashkilotining Samarqand sammiti haqida yozar ekan, uning ikkita muhim jihatiga e’tibor qaratdi. Birinchidan, bu Xitoy rahbari Si Szinpinning pandemiya boshlangandan beri ilk xorijiy safari bo‘lib, u, jumladan, Rossiya prezidenti Vladimir Putin bilan uchrashadi. Ikkinchidan, SHHT ko‘lami bo‘yicha BMTdan keyin turadigan yirik mintaqaviy tuzilmadir. Bu tashkilot zaminida dunyo aholisining 42 foizi istiqomat qiladi.
SHHT Yevropa Ittifoqi singari siyosiy tashkilot ham, NATO kabi harbiy blok ham emas, deb yozadi nashr. SHHTda O‘zbekiston alohida o‘ringa ega. Tashkilotga yaqinga qadar O‘zbekiston vakili, hozirda mamlakat tashqi ishlar vaziri Vladimir Norov rahbarlik qildi, sammitning Samarqandda o‘tkazilishi ham bejizga emas. Bu O‘zbekistonning katta diplomatik g‘alabasidir, deyiladi nashr maqolasida.
Le Figaro ekspertlarining ta’kidlashicha, O‘zbekiston chindan ham xalqaro munosabatlarning katta “shaxmat doskasi”da muhim o‘rin tutadi. Mamlakat Putinning Ukrainadagi urushini qo‘llab-quvvatlamaydi, bundan tashqari, u ehtiyotkorona tashqi siyosati tufayli Rossiya bilan ham, Xitoy bilan ham bir xil munosabatlarni saqlab qolmoqda. O‘zbek diplomatiyasi faol va ko‘pqirralidir.
Hozirda O‘zbekiston nafaqat tashkilot ichidagi turli yo‘nalishlarni rivojlantirishga ta’sir ko‘rsatmoqda, balki boshqa a’zo-davlatlar tomonidan ilgari surilayotgan takliflarni ham faol qo‘llab-quvvatlamoqda, deya e’tirof etdi ekspertlar. Masalan, mamlakat yaqinda SHHTning ulkan salohiyatini transport, kommunikatsiya, logistika, innovatsion va raqamli hamkorlikni, madaniy va ijtimoiy diplomatiyani rivojlantirishga yo‘naltirish zarurligini ta’kidlagan.
Nashr ekspertlari Hindiston, Pokiston hisobiga kengaygan tashkilot yaqin kelajakda Eron, Belarus, Misr, Qatar, Saudiya Arabistoni hisobiga Yaqin Sharq tarafga kengayishini qayd etgan. Turkiyaning ham ushbu tuzilmaga qo‘shilish ehtimoli yuqori. Xususan, sammitga mamlakat rahbari Rajab Toyyib Erdo‘g‘on taklif qilingan.
Izoh (0)