Afg‘onistonga tegishli 3,5 milliard dollarlik zaxiralarni Shveysariyaga o‘tkazish va ulardan afg‘on aholisi uchun maqsadli to‘lovlarda foydalanish to‘g‘risidagi AQSH qarori xalqaro huquqni buzishdir. Bu haqda “Tolibon” tashqi ishlar vazirligi bayonotiga tayanib, “Interfaks” xabar berdi.
“Ushbu zaxiralarni hech qachon qandaydir to‘lovlar uchun ishlatib bo‘lmaydi. Bu zaxiralarni afg‘on xalqining roziligisiz boshqa maqsadlarga sarflash AQSH tomonidan Afg‘onistonning iqtisodiy barqarorligiga qarshi tashlangan salbiy qadamdir”, — deyiladi TIV matbuot kotibi Abdul Kahar Balxiyning tarmoqlarda chop etilgan bayonotida.
“Afg‘on xalqining boyliklarini boshqa davlatga majburan o‘tkazish to‘g‘risida qaror qabul qilindi. Shuning uchun biz barcha xalq va tomonlarni ushbu noqonuniy va repressiv harakatlarni qoralab, afg‘on xalqini bu borada qo‘llab-quvvatlashga chaqiramiz”, — deyiladi hujjatda.
Qayd etilishicha, Afg‘onistondagi gumanitar inqirozning asosiy sabablari “Amerikaning 20 yillik urushi, AQSH tomonidan qo‘llab-quvvatlangan sobiq hukumatda keng tarqalgan korrupsiya hamda hukumat almashganidan so‘ng Afg‘oniston va uning bank sektoriga qarshi sanksiyalar joriy etilishi bo‘lib, xususan, ushbu sanksiyalar investorlarning yangi iqtisodiy imkoniyatlardan foydalanishiga to‘sqinlik qilmoqda”.
“Tolibon” ta’kidlashicha, “agar zaxiralar afg‘onlarning qonuniy talablarini inobatga olmasdan sarflansa, ular ushbu noqonuniy amaliyotga hissa qo‘shayotgan va Afg‘oniston Milliy banki zaxiralaridan noto‘g‘ri foydalanishga intilayotgan barcha shaxslar, muassasalar va kompaniyalar faoliyatini taqiqlashga majbur bo‘ladi”.
AQSH Afg‘oniston markaziy bankining chet eldagi milliardlab aktivlarini Shveysariya maqsadli fondiga o‘tkazishni rejalashtirayotgani haqida Reuters xabar bergan edi. Bunda to‘lovlar xalqaro kengash yordamida amalga oshiriladi hamda AQSH va BMT sanksiyalari ostida bo‘lgan “Tolibon” yetakchilarini chetlab o‘tadi. Manbalarning ta’kidlashicha, AQSH rasmiylari Shveysariya va boshqalar bilan maqsadli fond rejasini muhokama qilgan.
Jo Bayden ma’muriyati tomonidan musodara qilingan 3,5 milliard dollar birinchi o‘rinda maqsadli fondga o‘tkazilishi va Afg‘onistonning Jahon banki oldidagi qarzini to‘lash, shuningdek, afg‘oniy pul birligini bosib chiqarish, milliy valyuta va pasportlarni chiqarish uchun ishlatilishi mumkin.
Izoh (0)