Joze Mourinyo boshchiligidagi “Roma” hayratlanarli haftani o‘tkazdi. Dastlab A Seriyada “Udineze”ga 0:4 hisobida mag‘lub bo‘ldi. Keyin esa Bolgariyada Yevropa Ligasi doirasida “Ludogorets”ga 1:2 hisobida imkoniyatni boy berdi. Mo‘jiza shu bilan yakuniga yetmaydi. “Roma” tarkibida nom jihatdan kuchli hujum chizig‘i bo‘lishi mumkin, biroq shu ikki muvaffaqiyatsiz o‘yinda yagona golni Eldor Shomurodov urdi. O‘zbekistonlik futbolchi boshqacha vaziyatga tushib qolgani va hozircha undan g‘olib sifatida chiqayotgani haqida Georgiy Shakov mulohaza yuritdi.
Mourinyo eshikni ko‘rsatdi
Shomurodov “Roma”ga Italiya futbolidagi porlayotgan yulduz sifatida o‘tgandi. Eldor “Jenoa” safida muntazam gol urgan va potensial jihatdan Temmi Abrahamga raqobatchi bo‘lishi kutilgandi.Hujumchi Mourinyo futbolida o‘zini topa olmadi, buning ustiga asosiy raqobatchisi ajoyib o‘yinlar namoyish etdi. Abrahamning narxi bir mavsumda 100 million yevrogacha ko‘tarildi. Shomurodov zaxira futbolchisi sifatida 28 o‘yinda 7 ta golli vaziyatda ishtirok etgan bo‘lsa-da, angliyalik hujumchi fonida omadsiz transfer deya e’tirof etildi. Futbol jihatidan oladigan bo‘lsak, jamoaga qaysidir ma’noda foyda keltirdi.
Shomurodovning Rimdagi sarguzashtlari yozda nihoyasiga yetishi lozim edi. Mourinyo Eldorning saviyasi “Jenoa” va RPL orasidaligi, Rimga jiddiyroq futbolchilar kelishini ochiqchasiga bildirdi.
O‘tgan o‘yinda hujumchi o‘rniga yarim himoyachini maydonga tushirishimga to‘g‘ri keldi. Zaxirada kerakli saviyadagi hujumchi yo‘q, shunchaki Shomurodovning u darajaga chiqishini kutib tura olmayman, “Roma”da bunday imkoniyat yo‘q, — shunday og‘riqli so‘zlarni gapirgandi Joze.Shundan keyin rimliklar Yevropa chempioni Andrea Belotti bilan shartnoma imzoladi, o‘zbekistonlik hujumchiga esa yangi jamoa izlashga kirishildi, biroq qayg‘uli final o‘rniga hikoyaning kutilmagan davomi paydo bo‘ldi.
Shomurodov — loyihaning bir qismi
Eldor uchun A Seriyaning bir nechta jamoasi ovga chiqdi. “Monsa”, “Bolonya” va “Torino” kabi klublar futbolchi uchun faol kurash olib bordi. Joze Shomurodovning darajasi haqida salbiy fikr bildirgan bo‘lsa ham, “Roma” o‘zbekistonlik futbolchi uchun sarflangan 15 million yevroni chiqarib olmoqchi bo‘ldi va unga shu atrofida narx belgiladi. Natijada bu narx nomzodlarni qo‘rqitdi.Transfer oynasi yakunlanishi arafasida futbolchining agenti Qahhor Mo‘minov bayonot bilan chiqdi. Vakil Eldorning “Roma” rahbariyati bilan muammosi yo‘qligini ta’kidladi. Garchi Jozening avvalgi gaplari fonida haqiqatdek tuyulmasa-da, rahbariyat Shomurodovni loyihaning bir qismi sifatida ko‘rayotganini bildirgan.
Obyektiv qaralsa Eldorning “Roma” asosiy tarkib futbolchisi bo‘lish imkoniyati “Rostov”ning Rossiya chempioni bo‘lish imkoniyati bilan teng. Temmi Abraham asosiy tarkibning almashtirib bo‘lmas futbolchisi bo‘lib qoladi. Abdrea Belotti esa yangi chaqiriqni qabul qildi, u shunchaki yulduzni almashtiruvchi vazifasini o‘taydi. Shu tariqa italiyalik futbolchi Yevropa Ligasi o‘yinlarida asosiy tarkib futbolchiga aylanadi. Paulo Dibala va “yolg‘onchi to‘qqizlik” sxemasini ham unutmaslik lozim. Qo‘shimchasiga argentinalik hujumchi pozitsiyasida ham o‘ynay oladi.
Shomurodov — hujumchi pozitsiyasida uchinchi yo to‘rtinchi tanlov bo‘lib qoladi. Undan tashqari raqobatchilarining barchasida uzoq muddatlik shartnomalar mavjud, murabbiy esa o‘zbekistonlik o‘rniga yarim himoyachini maydonga tushirishni afzal bilishini ochiqchasiga aytgan.
Istehzodan imkoniyatgacha
Shomurodov Rimda qattiq tanqidga duch kelmadi. Shu bilan birga muxlislar yozda uning sotuvga qo‘yilishiga moslashib ulgurgandi. Bu borada ortiqcha afsuslanishlar bo‘lmadi.Oxirgi bir hafta ichida Eldor haqidagi gaplarda ohang sezilarli darajada o‘zgardi. O‘zbekistonlik hujumchi “Ludogorets”ga qarshi bahsda o‘z imkoniyatiga ega bo‘ldi va yulduz Belottidan ko‘ra samaraliroq o‘ynadi. Shomurodov boshi bilan yuqori sifatdagi golni urdi va ajoyib harakatlar ko‘rsatdi. Ijtimoiy tarmoqlarda esa maqtovlar uzoq kuttirmadi.
“Balki gap unga yetarli o‘yin amaliyoti berilmayotgandir. U biz uchun yangi Kvaratsxeliyaga aylanishi mumkin!”
“Eshiting, uning maydonda to‘pni nazorat qilishi va harakatlari Belotti, hattoki Abrahamnikidan yaxshiroq”.
“Zaniolo, Eldor va Dibala — bizning eng yaxshi uchligimiz”.
“Mourinyo Shomurodovga nisbatan adolatli ishlamayapti. U baribir zaxirada qoladi. O‘tgan mavsum ‘Venetsiya’ga qarshi o‘yinda gol va golli uzatmani amalga oshirgandi, keyinchalik ham zaxirada qoldirilgan”.
“Roma” ustozi bu safar Eldorning o‘yini haqida hech narsa gapirmadi, biroq Italiya nashrlarining deyarli barchasi Bolgariyadagi o‘yinda uni “Roma”ning eng yaxshi futbolchisi deb atadi.
Istiqbol
Bolgariyada urgan goli bilan Shomurodov yaqin oradagi o‘yinlar uchun o‘ziga imkoniyat yaratib oldi. Joze Mourinyo faoliyatida qattiq tanqidlardan so‘ng murabbiy kutilmaganda zaxiradagi futbolchini asosiy o‘yinchiga aylantirib qo‘ygani ko‘p uchraydi.Hattoki mavsum boshida ham Eldor butunlay o‘yin amaliyotidan mahrum bo‘lgandek taassurot qoldirgandi, ammo bitta kuchli o‘yin barchasini o‘zgartirib yuboradi. Qishgacha Shomurodov aniq idealdan uzoq bo‘lgan rimliklar loyihasining bir qismi bo‘lib qoladi.
Qishda, ehtimol, u yana bir nechta takliflar oladi va albatta, A Seriyaning boshqa klubida o‘zining Yevropadagi sayohatini davom ettiradi.
Izoh (0)