Жозе Моуриньо бошчилигидаги «Рома» ҳайратланарли ҳафтани ўтказди. Дастлаб А Серияда «Удинезе»га 0:4 ҳисобида мағлуб бўлди. Кейин эса Болгарияда Европа Лигаси доирасида «Лудогорец»га 1:2 ҳисобида имкониятни бой берди. Мўъжиза шу билан якунига етмайди. «Рома» таркибида ном жиҳатдан кучли ҳужум чизиғи бўлиши мумкин, бироқ шу икки муваффақиятсиз ўйинда ягона голни Элдор Шомуродов урди. Ўзбекистонлик футболчи бошқача вазиятга тушиб қолгани ва ҳозирча ундан ғолиб сифатида чиқаётгани ҳақида Георгий Шаков мулоҳаза юритди.
Моуриньо эшикни кўрсатди
Шомуродов «Рома»га Италия футболидаги порлаётган юлдуз сифатида ўтганди. Элдор «Женоа» сафида мунтазам гол урган ва потенциал жиҳатдан Тэмми Абраҳамга рақобатчи бўлиши кутилганди.Ҳужумчи Моуриньо футболида ўзини топа олмади, бунинг устига асосий рақобатчиси ажойиб ўйинлар намойиш этди. Абраҳамнинг нархи бир мавсумда 100 миллион еврогача кўтарилди. Шомуродов захира футболчиси сифатида 28 ўйинда 7 та голли вазиятда иштирок этган бўлса-да, англиялик ҳужумчи фонида омадсиз трансфер дея эътироф этилди. Футбол жиҳатидан оладиган бўлсак, жамоага қайсидир маънода фойда келтирди.
Шомуродовнинг Римдаги саргузаштлари ёзда ниҳоясига етиши лозим эди. Моуриньо Элдорнинг савияси «Женоа» ва РПЛ орасидалиги, Римга жиддийроқ футболчилар келишини очиқчасига билдирди.
Ўтган ўйинда ҳужумчи ўрнига ярим ҳимоячини майдонга туширишимга тўғри келди. Захирада керакли савиядаги ҳужумчи йўқ, шунчаки Шомуродовнинг у даражага чиқишини кутиб тура олмайман, «Рома»да бундай имконият йўқ, — шундай оғриқли сўзларни гапирганди Жозе.Шундан кейин римликлар Европа чемпиони Андреа Белотти билан шартнома имзолади, ўзбекистонлик ҳужумчига эса янги жамоа излашга киришилди, бироқ қайғули финал ўрнига ҳикоянинг кутилмаган давоми пайдо бўлди.
Шомуродов — лойиҳанинг бир қисми
Элдор учун А Сериянинг бир нечта жамоаси овга чиқди. «Монса», «Болонья» ва «Торино» каби клублар футболчи учун фаол кураш олиб борди. Жозе Шомуродовнинг даражаси ҳақида салбий фикр билдирган бўлса ҳам, «Рома» ўзбекистонлик футболчи учун сарфланган 15 миллион еврони чиқариб олмоқчи бўлди ва унга шу атрофида нарх белгилади. Натижада бу нарх номзодларни қўрқитди.Трансфер ойнаси якунланиши арафасида футболчининг агенти Қаҳҳор Мўминов баёнот билан чиқди. Вакил Элдорнинг «Рома» раҳбарияти билан муаммоси йўқлигини таъкидлади. Гарчи Жозенинг аввалги гаплари фонида ҳақиқатдек туюлмаса-да, раҳбарият Шомуродовни лойиҳанинг бир қисми сифатида кўраётганини билдирган.
Объектив қаралса Элдорнинг «Рома» асосий таркиб футболчиси бўлиш имконияти «Ростов»нинг Россия чемпиони бўлиш имконияти билан тенг. Тэмми Абраҳам асосий таркибнинг алмаштириб бўлмас футболчиси бўлиб қолади. Абдреа Белотти эса янги чақириқни қабул қилди, у шунчаки юлдузни алмаштирувчи вазифасини ўтайди. Шу тариқа италиялик футболчи Европа Лигаси ўйинларида асосий таркиб футболчига айланади. Пауло Дибала ва «ёлғончи тўққизлик» схемасини ҳам унутмаслик лозим. Қўшимчасига аргентиналик ҳужумчи позициясида ҳам ўйнай олади.
Шомуродов — ҳужумчи позициясида учинчи ё тўртинчи танлов бўлиб қолади. Ундан ташқари рақобатчиларининг барчасида узоқ муддатлик шартномалар мавжуд, мураббий эса ўзбекистонлик ўрнига ярим ҳимоячини майдонга туширишни афзал билишини очиқчасига айтган.
Истеҳзодан имкониятгача
Шомуродов Римда қаттиқ танқидга дуч келмади. Шу билан бирга мухлислар ёзда унинг сотувга қўйилишига мослашиб улгурганди. Бу борада ортиқча афсусланишлар бўлмади.Охирги бир ҳафта ичида Элдор ҳақидаги гапларда оҳанг сезиларли даражада ўзгарди. Ўзбекистонлик ҳужумчи «Лудогорец»га қарши баҳсда ўз имкониятига эга бўлди ва юлдуз Белоттидан кўра самаралироқ ўйнади. Шомуродов боши билан юқори сифатдаги голни урди ва ажойиб ҳаракатлар кўрсатди. Ижтимоий тармоқларда эса мақтовлар узоқ куттирмади.
«Балки гап унга етарли ўйин амалиёти берилмаётгандир. У биз учун янги Кварацхелияга айланиши мумкин!»
«Эшитинг, унинг майдонда тўпни назорат қилиши ва ҳаракатлари Белотти, ҳаттоки Абраҳамникидан яхшироқ».
«Заниоло, Элдор ва Дибала — бизнинг энг яхши учлигимиз».
«Моуриньо Шомуродовга нисбатан адолатли ишламаяпти. У барибир захирада қолади. Ўтган мавсум ‘Венецияъга қарши ўйинда гол ва голли узатмани амалга оширганди, кейинчалик ҳам захирада қолдирилган».
«Рома» устози бу сафар Элдорнинг ўйини ҳақида ҳеч нарса гапирмади, бироқ Италия нашрларининг деярли барчаси Болгариядаги ўйинда уни «Рома»нинг энг яхши футболчиси деб атади.
Истиқбол
Болгарияда урган голи билан Шомуродов яқин орадаги ўйинлар учун ўзига имконият яратиб олди. Жозе Моуриньо фаолиятида қаттиқ танқидлардан сўнг мураббий кутилмаганда захирадаги футболчини асосий ўйинчига айлантириб қўйгани кўп учрайди.Ҳаттоки мавсум бошида ҳам Элдор бутунлай ўйин амалиётидан маҳрум бўлгандек таассурот қолдирганди, аммо битта кучли ўйин барчасини ўзгартириб юборади. Қишгача Шомуродов аниқ идеалдан узоқ бўлган римликлар лойиҳасининг бир қисми бўлиб қолади.
Қишда, эҳтимол, у яна бир нечта таклифлар олади ва албатта, А Сериянинг бошқа клубида ўзининг Европадаги саёҳатини давом эттиради.
Изоҳ (0)