O‘zbekistonning Ispaniyadagi elchixonasi vakillari Valensiya hamjamiyatining “Ateval” to‘qimachilik tadbirkorlari uyushmasi rahbariyati va qator yirik to‘qimachilik kompaniyalari vakillari bilan uchrashdi, deb xabar bermoqda Dunyo axborot agentligi.
Qayd etilishicha, uchrashuv doirasida Ispaniya tomoniga O‘zbekistonning to‘qimachilik sohasidagi salohiyati taqdimoti tashkil etilgan. Barcha jarayon klaster kompaniyalari tomonidan olib borilishi natijasida mazkur soha bozor iqtisodiyoti tamoyillari asosida faoliyat ko‘rsatayotgani, hozirgi paytda mamlakatda yetishtiriladigan 1 million tonna paxta to‘liq O‘zbekistonda qayta ishlanilishi ta’kidlangan. O‘zbek kompaniyalari o‘z mahsulotlari uchun Yevropa Ittifoqi bozorida talab etiladigan eng nufuzli xalqaro sertifikatlarga ega bo‘layotgani va bunday kompaniyalar soni kundan kunga o‘sib kelayotgani ham qayd etilgan.
Bundan tashqari, 2011-yilda xalqaro Cotton Campaign koalitsiyasi tomonidan paxta yetishtirishda majburiy va bolalar mehnatidan foydalanib kelingani sababli O‘zbekiston paxtasiga qo‘yilgan boykot joriy yilning 10-mart kuni olib tashlagani alohida ta’kidlangan.
Muzokaralar jarayonida “Ateval” uyushmasi raisi Xose Serna Reverta O‘zbekistondagi barcha ijobiy o‘zgarishlarni, izchil olib borilayotgan islohotlarni, O‘zbekistonning xalqaro maydondagi obro‘yi va nufuzi o‘sib borayotganini alohida e’tirof etgan.
“O‘zbek to‘qimachilik korxonalari mahsulotlari, ayniqsa, Farg‘ona vodiysi kompaniyalari tomonidan ishlab chiqilayotgan paxta va ipak matolariga nafaqat Ispaniyada, balki butun dunyoda qiziqish ortib bormoqda”, — degan xorijlik ekspert.
Ma’lumot uchun, 1977-yilda tashkil etilgan “Ateval” Valensiya hamjamiyatining to‘qimachilik tadbirkorlari uyushmasi hisoblanadi. Uyushma faoliyatidan ko‘zlanadigan asosiy maqsad Valensiya to‘qimachilik kompaniyalarining umumiy manfaatlarini himoya qilish va ifodalash bilan izohlanadi. Hozirgi kunda u 300 dan ortiq a’zo kompaniyalarni o‘z atrofiga birlashtirgan.
Izoh (0)