Ўзбекистоннинг Испаниядаги элчихонаси вакиллари Валенсия ҳамжамиятининг «Атевал» тўқимачилик тадбиркорлари уюшмаси раҳбарияти ва қатор йирик тўқимачилик компаниялари вакиллари билан учрашди, деб хабар бермоқда Дунё ахборот агентлиги.
Қайд этилишича, учрашув доирасида Испания томонига Ўзбекистоннинг тўқимачилик соҳасидаги салоҳияти тақдимоти ташкил этилган. Барча жараён кластер компаниялари томонидан олиб борилиши натижасида мазкур соҳа бозор иқтисодиёти тамойиллари асосида фаолият кўрсатаётгани, ҳозирги пайтда мамлакатда етиштириладиган 1 миллион тонна пахта тўлиқ Ўзбекистонда қайта ишланилиши таъкидланган. Ўзбек компаниялари ўз маҳсулотлари учун Европа Иттифоқи бозорида талаб этиладиган энг нуфузли халқаро сертификатларга эга бўлаётгани ва бундай компаниялар сони кундан кунга ўсиб келаётгани ҳам қайд этилган.
Бундан ташқари, 2011 йилда халқаро Cotton Campaign коалицияси томонидан пахта етиштиришда мажбурий ва болалар меҳнатидан фойдаланиб келингани сабабли Ўзбекистон пахтасига қўйилган бойкот жорий йилнинг 10 март куни олиб ташлагани алоҳида таъкидланган.
Музокаралар жараёнида «Атевал» уюшмаси раиси Хосе Серна Реверта Ўзбекистондаги барча ижобий ўзгаришларни, изчил олиб борилаётган ислоҳотларни, Ўзбекистоннинг халқаро майдондаги обрўйи ва нуфузи ўсиб бораётганини алоҳида эътироф этган.
«Ўзбек тўқимачилик корхоналари маҳсулотлари, айниқса, Фарғона водийси компаниялари томонидан ишлаб чиқилаётган пахта ва ипак матоларига нафақат Испанияда, балки бутун дунёда қизиқиш ортиб бормоқда», — деган хорижлик эксперт.
Маълумот учун, 1977 йилда ташкил этилган «Атевал» Валенсия ҳамжамиятининг тўқимачилик тадбиркорлари уюшмаси ҳисобланади. Уюшма фаолиятидан кўзланадиган асосий мақсад Валенсия тўқимачилик компанияларининг умумий манфаатларини ҳимоя қилиш ва ифодалаш билан изоҳланади. Ҳозирги кунда у 300 дан ортиқ аъзо компанияларни ўз атрофига бирлаштирган.
Изоҳ (0)