AOKAda o‘tkazilgan brifingda Oila va xotin-qizlar davlat qo‘mitasi axborot xizmati rahbari Nilufar Jumayeva bu haqda batafsil ma’lumot berdi.
2022-yil 8-avgustda O‘zbekiston Respublikasi Vazirlar Mahkamasining “Oqila ayollar” harakati faoliyatini tashkil etish chora-tadbirlari to‘g‘risidagi 437-son Qarori qabul qilindi, bir so‘z bilan aytganda harakatning huquqiy asosi yaratildi. Oila va xotin-qizlar davlat qo‘mitasi tomonidan o‘z o‘rnida “Oqila ayollar” harakatini tashkil etish bo‘yicha tegishli chora-tadbirlar belgilab olindi.
Jamiyatda yangi ma’naviy makon yaratishda xotin-qizlarning faolligini qo‘llab-quvvatlash, farzand tarbiyasi, oila, xotin-qizlar ma’naviyatini yuksaltirishda jamoatchilikka, eng avvalo, yoshlarga tarbiyaviy ta’sir ko‘rsata oladigan obro‘-e’tiborli va katta hayotiy tajribaga ega bo‘lgan, faol va tashabbuskor ayollarning sa’y-harakatlarini birlashtirish uchun zarur shart-sharoitlar yaratish maqsadida O‘zbekiston Respublikasi Oila va xotin-qizlar davlat qo‘mitasi hamda keng jamoatchilikning qo‘mita, Qoraqalpog‘iston Respublikasi Oila va xotin-qizlar qo‘mitasi, viloyatlar va Toshkent shahar oila va xotin-qizlar boshqarmalari hamda tuman (shahar) oila va xotin-qizlar bo‘limlarida doimiy asosda faoliyat yurituvchi yuridik shaxs bo‘lmagan jamoatchilik tuzilmasi — “Oqila ayollar” harakati tashkil etildi.
Qo‘mita tomonidan “Oqila ayollar” harakatini hududlarda tashkil etish bo‘yicha buyruq, nizom va chora-tadbirlar rejasi ishlab chiqildi. Unga ko‘ra, hududlarda hududiy harakat tarkibi, nizomi va 2022-yil II yarim yillikka mo‘ljallangan ish rejasini tasdiqlash, ish rejasini shakllantirish, Harakat va “Ma’rifat” targ‘ibotchilar jamiyatining o‘zaro hamkorligida mahallalarda ijtimoiy-ma’naviy muhitni sog‘lomlashtirish, oila va xotin-qizlar ma’naviyatini yuksaltirishga qaratilgan chora-tadbirlarni belgilashga alohida e’tibor qaratilishi belgilangan.
Harakat, qoida tariqasida, qo‘mitada — 50 nafar, tegishlicha Qoraqalpog‘iston Respublikasi Oila va xotin-qizlar qo‘mitasi, viloyatlar va Toshkent shahar oila va xotin-qizlar boshqarmalarida – 35-40 nafardan, tuman (shahar) oila va xotin-qizlar bo‘limlarida – 30 nafardan, mahallada 15 nafardan faol va tashabbuskor ayollardan iborat tarkibda shakllantirilmoqda.
Bu borada hududlarda, shahar,tumanlarda, mahallalarda tashkil etilgan faol ayollardan iborat targ‘ibotchi guruhlar, ko‘cha boshilar “Oqila ayollar” harakatiga jipslashtirilmoqda.
Bugungi kunda harakatning 75 mingdan ziyod a’zolari shakllantirilib, umumiy hisobda respublika bo‘yicha 147 085 nafar a’zolari ro‘yxati tayyorlanmoqda.
Shu o‘rinda savol tug‘iladi ushbu jamoatchilik tuzilmasi nima beradi? Bu savolga harakatning asosiy vazifalari javob beradi:
- jamiyatda yangi ma’naviy makon yaratish, ezgu g‘oyalar, milliy qadriyatlar, urf-odatlar, muqaddas an’analarni singdirishga qaratilgan tizimli targ‘ibot- tashviqot ishlarini olib borish;
- mahallalarda oilalarni mustahkamlash, farzand tarbiyasida ota-onaning mas’uliyati, ibratli ota-ona bo‘lishning ahamiyati, ma’rifatli jamiyatni qurishda ma’rifatli onalarning rolini keng targ‘ib qilish;
- ayollar, ayniqsa, yosh qizlarda oilaga va Vatanga sadoqat, fidoyilik, tashabbuskorlik tuyg‘ularini singdirish, “odobli qiz” va “ma’rifatli ona” qiyofasini shakllantirishga qaratilgan chora-tadbirlarni amalga oshirish;
- farzand, ayniqsa, qizlar tarbiyasi, oila, onalar ma’naviyatini yuksaltirish, oilalarda kitobxonlik, mutolaa madaniyatini targ‘ib etish, o‘zaro mehr-oqibat va hamjihatlikni shakllantirish, oilaning tarbiyaviy-ta’lim salohiyatini mustahkamlashga ko‘maklashish;
- yoshlar o‘rtasida oilaviy-huquqiy munosabatlar, oilaviy hayot psixologiyasi, oila iqtisodi va byudjeti, reproduktiv salomatlik asoslari, ma’naviy-axloqiy qadriyatlarga nisbatan hurmat ruhida bo‘lish masalalarini hamda “Oila — muqaddas” tushunchasini keng targ‘ib qilish;
- xotin-qizlarning mamlakatda amalga oshirilayotgan islohotlarga daxldorlik hissini oshirish, ularga qabul qilinayotgan qonunchilik hujjatlarining mazmun-mohiyati va ahamiyatini xalqchil tilda tushuntirish.
Harakat va uning boshlang‘ich guruhlari tarkibiga kiritilgan faol va tashabbuskor ayollar Harakat tomonidan “Ma’rifat” targ‘ibotchilar jamiyati bilan hamkorlikda mahallalarda ijtimoiy-ma’naviy muhitni sog‘lomlashtirish, farzand tarbiyasi, oila va xotin-qizlar ma’naviyatini yuksaltirish yo‘nalishida amalga oshirgan ishlarining natijadorligiga ko‘ra jismoniy va yuridik shaxslarning homiylik xayriyalari hamda qonunchilik hujjatlarida taqiqlanmagan boshqa manbalar hisobidan rag‘batlantirib boriladi.
Bunda faol va tashabbuskor ayollar faoliyati natijalari bo‘yicha tegishlicha Qo‘mita raisi, Qoraqalpog‘iston Respublikasi Oila va xotin-qizlar qo‘mitasi raisi, viloyatlar va Toshkent shahar oila va xotin-qizlar boshqarmalari, tuman (shahar) oila va xotin-qizlar bo‘limlari boshliqlari tavsiyasiga asosan davlat mukofotlari, “Mo‘tabar ayol”, “Mahalla iftixori”, “Mehnat faxriysi” ko‘krak nishoni va boshqa esdalik, ko‘krak nishonlari, idoraviy mukofotlarga tavsiya etiladi.
Harakat faoliyatining asosiy yo‘nalishlari bo‘yicha chora-tadbirlarni samarali amalga oshirish borasida mahalladagi Oilaviy qadriyatlarni mustahkamlash komissiyasi, Xotin-qizlar bilan ishlash bo‘yicha komissiya, “Ota-onalar universiteti”, “Ayollar maslahat kengashi” va boshqa jamoatchilik tuzilmalari bilan tizimli hamkorlikni amalga oshiradi.
Izoh (0)