“O‘zmilliybank” AJda “Bank transformatsiyasi”ga bag‘ishlangan trening tashkil etildi. Mazkur treningda bankning tarkibiy bo‘linmalaridan 150 nafarga yaqin rahbar xodimlar ishtirok etdi.
Tadbirning taqdimot qismida bankning Transformatsion ofisi xodimlari tomonidan ishtirokchilarga strategiyaning asosiy yo‘nalish va vazifalari, shuningdek, 2025-yilgacha amalga oshirilishi rejalashtirilgan tashabbus va loyihalar haqida ma’lumot berildi.
Tadbirda “O‘zmilliybank” AJ boshqaruv raisi o‘rinbosari so‘zga chiqib: “Strategik maqsadlarni muvaffaqiyatli amalga oshirilishi, avvalo o‘zimizga, umuman olganda, to‘g‘ri tuzilgan jamoaviy ishimizga bog‘liq. Ishonamanki, bugungi strategik sessiya doirasidagi muloqot barcha ishtirokchilar uchun foydali bo‘ladi va albatta, kelgusida butun mamlakat bank tizimining rivojlanishiga o‘z ta’sirini o‘tkazadi” – deya ta’kidladi.
Tadbirning ikkinchi qismida ishtirokchilar guruhlarga bo‘lingan holda intelektual quiz tashkil etildi. Filiallar rahbar hodimlari bugungi kunda xizmat ko‘rsatish jarayonida kuzatilayotgan muammolarni muhokama qildi, ularga eng yaxshi yechimlarni topish uchun g‘oyalar izladi. Shuningdek, “O‘zmilliybank” AJning barcha xodimlari amalga oshirilayotgan transformatsiya jarayonlarida faol ishtirok etishlari hamda bank faoliyati samaradorligini oshirish bo‘yicha o‘z taklif-mulohazalarini bildirish imkoniyatiga ega bo‘lishlari uchun bu kabi tadbirlarni muntazam ravishda o‘tkazib borilishi alohida ta’kidlandi.
Do‘stona muhit xamda ko‘tarinki kayfiyat hukmronlik qilgan treningda “O‘zmilliybank” tizimida faoliyat yurituvchi har bir xodimni transformatsiya jarayoniga jalb qilish maqsadida bankning barcha filiallarida shu kabi tadbirlar tashkil etilishi belgilab olindi.
Tadbir doirasida norasmiy muloqot muhitini yaratish, jamoaviy ruh va jamoada ishlash qobiliyatini shakllantirish, yangi yetakchilarni aniqlashga qaratilgan timbilding, turli tanlovlar, intellektual bellashuvlar tashkil etildi.
Izoh (0)