Tarixiy g‘alaba. O‘zbekiston terma jamoasi shaxmat Olimpiadasi g‘olibiga aylandi

Hindistonning Chennai shahri mezbonlik qilgan 44-Butunjahon shaxmat Olimpiadasining so‘nggi tur bahslari 9-avgust, seshanba kuni bo‘lib o‘tdi.

O‘zbekiston erkaklar terma jamoasi hal qiluvchi turda Niderlandiyaga qarshi bahs olib bordi.

Jahongir Vohidov o‘z partiyasini g‘alaba bilan yakunladi. Nodirbek Abdusattorov, Nodirbek Yoqubboyev va Javohir Sindorov esa durang qayd etdi. O‘zbekiston 2,5:1,5 hisobida g‘alaba qozondi.

Mazkur g‘alaba orqali O‘zbekiston erkaklar terma jamoasi oltin medal masalasini hal qildi va o‘z tarixida ilk bor Olimpiada chempioniga aylandi.

Qayd etish kerak, O‘zbekiston erkaklar terma jamoasi Olimpiadada birorta turni boy bermagan yagona jamoa bo‘ldi.

O‘zbekiston erkaklar terma jamoasi shaxmat Olimpiadasida Nepal (4:0), Farer orollari (4:0), Sloveniya (3:1), Slovakiya (4:0), Peru (4:0), Germaniya (2,5:1,5), Armaniston (3:1) termalarini yutgan bo‘lsa, AQSH, Hindiston va Hindiston-2 bilan durang (2:2) o‘ynadi.

Avvalroq 2026-yilda o‘tkaziladigan 46-Butunjahon shaxmat Olimpiadasiga O‘zbekiston mezbonlik qilishi ma’lum bo‘lgandi.