Namangan viloyat bojxona boshqarmasi va Davlat xavfsizlik xizmati xodimlari hamkorlikda Kosonsoy tumanida tezkor tadbir o‘tkazdi. Bu haqda “Daryo” muxbiri Azizbek Abduvaliyev xabar bermoqda.
Tadbir davomida Yangiqo‘rg‘on—Kosonsoy yo‘nalishida xarakatlanayotgan Volvo rusumli yuk mashinasi Kosonsoy tumanining Jar mahallasida to‘xtatilib, xolislar ishtirokida ko‘zdan kechirildi.
Ko‘zdan kechirish chog‘ida mashina yukxonasidagi maxfiy joyda 18 ta sintetik qopga joylangan 5800 dona ayollar kiyim-kechagi borligi aniqlandi.
Umumiy summasi 1 milliard 160 million so‘m bo‘lgan ushbu tovarlar muqaddam Qirg‘izistondan aylanma yo‘llar orqali noqonuniy ravishda O‘zbekiston hududiga olib o‘tilgani ma’lum bo‘ldi.
Hozirda mazkur holat yuzasidan tergovga qadar surishtiruv ishlari olib borilmoqda.
Mavzuga doir: Namanganda mashina o‘rindig‘i ostida qariyb 1 kg gashish olib ketayotgan yo‘lovchi qo‘lga olindi
Izoh (0)