Ispaniyada qariyb bir haftadan buyon davom etayotgan jazirama tufayli 360 kishi halok bo‘ldi. Bu haqda Karlos III nomidagi davlat sog‘liqni saqlash instituti ma’lumotlariga tayanib, Reuters xabar berdi.
Ispaniyada havo harorati 45,7 darajaga chiqdi. Qo‘shni Portugaliyada esa bir necha kun davomida havo harorati 40 darajaga yetdi. Portugaliya Sog‘liqni saqlash vazirligining ma’lum qilishicha, 7—13-iyul kunlari anomal issiqlik tufayli 238 kishi halok bo‘lgan, ularning aksariyati keksalardir.
Portugaliya, Ispaniya va Fransiyada yuz bergan o‘rmon yong‘inlari minglab odamlarni uylarini tark etishga majbur qildi. Ispaniyaning Malaga provinsiyasida 3000 dan ortiq odam evakuatsiya qilindi. Fransiyaning Jirond hududidan 12,2 ming kishi evakuatsiya qilindi — u yerda o‘rmon yong‘inlari maydoni bir sutkada 10 ming gektargacha kengaygan.
Buyuk Britaniyada kutilayotgan issiqlik tufayli 15-iyul kuni aholi uchun birinchi marta maksimal — xavfning qizil darajasi e’lon qilindi. Sinoptiklarning ma’lumotlariga ko‘ra, 18 va 19-iyul kunlari London, Manchester va Yorkni o‘z ichiga olgan hududda havo harorati 40 darajagacha ko‘tariladi, deb xabar bermoqda BBC News.
Izoh (0)