Avvalroq, Ilon Mask Twitter ijtimoiy tarmog‘ini sotib olishdan bosh tortgandi. Bunga javoban Twitter kompaniyasi milliarderni sudga bergandi.

Milliarderning advokatlari suddan ishni ko‘rib chiqishni 2023-yil fevraligacha qoldirishga chaqirdi.

2022-yil 16-iyulda Ilon Maskning advokatlari Delaver sudidan Twitter’ning milliarderga qarshi da’vo arizasi bo‘yicha tezlashtirilgan to‘rt kunlik sud jarayonini o‘tkazish haqidagi iltimosini rad etishni so‘radi.

Mask vakillarining ta’kidlashicha, “bunday miqyosdagi” ishlarni bunchalik qisqa vaqt ichida yakunlab bo'lmaydi. “Twitter bu jarayonlarning yorug‘lik tezligida o‘tishini istaydi”, deb yozadi advokatlar bayonotida.

Ilon Maskning fikricha, Twitter’ning ishni tezlashtirishga urinishi kompaniyaning soxta yoki spam akkauntlar soni haqidagi haqiqatni yashirish istagi bilan bog‘liq.

Tadbirkorning advokatlari suddan tinglovni 2023-yilning 13-fevraliga ko‘chirishni so‘rashdi, chunki Mask vakillari “katta hajmdagi ma’lumotlarni tahlil qilishi” kerak.

Sudya 19-iyul kuni Maskning arizasi bo‘yicha sud majlisini o‘tkazadi.