Yevropada keng ko‘lamli o‘rmon yong‘inlari yuz bermoqda, o‘t o‘chiruvchilar yetishmayapti (foto)
Yevropada anomal issiqlik boshlandi, bu Portugaliya, Ispaniya, Xorvatiya va Fransiya janubida o‘rmon yong‘inlarini keltirib chiqardi. Ba’zi hududlarda xavfning qizil darajasi e’lon qilindi. Uylar, shaxsiy avtomobillar, qishloq xo‘jaligi texnikasi va yog‘ochni qayta ishlash zavodi yong‘indan zarar ko‘rgan. Yevropada yong‘inlar qanday kechayotgani haqida “RBK” fotoreportaj tayyorladi.
Foto: AP Photo
Portugaliya
Portugaliya dengiz va atmosfera instituti IPMA ma’lumotlariga ko‘ra, 13-iyul kuni Portugaliyada 2022-yil yozidagi maksimal harorat qayd etilgan — 46,3 gradus. Rádio e Televisão de Portugal xabariga ko‘ra, issiq havo tufayli Portugaliyaning aksariyat hududlarida xavfning qizil darajasi e’lon qilingan. Qishloq joylarda yuzaga kelgan yong‘inlar yuzdan ortiq okruglarga zarar yetkazishi mumkin. Portugaliya markazidagi Bemposta qishlog‘ida yong‘in turar joy binolariga yaqinlashdi, bu esa mahalliy aholining evakuatsiya qilinishiga olib keldi.
Oren shahridagi yong‘in bir haftadan beri davom etmoqda. Rádio e Televisao de Portugal xabariga ko‘ra, yong‘inni o‘chirishga 400 dan ortiq o‘t o‘chiruvchi jalb qilingan, ularga maxsus texnika va vertolyotlar ham yordam bermoqda. Foto: Reuters
Leyriyadagi Pombal shahri meri Narsishu Mota Expresso nashriga munitsipalitetdagi yong‘in bilan bog‘liq vaziyat “juda xavotirli” bo‘lib qolayotganini aytdi va o‘t o‘chiruvchilar charchagani haqida ogohlantirdi. Foto: Reuters
Fuqarolik muhofazasi qo‘mondoni 600 dan ortiq odam uylaridan evakuatsiya qilinganini aytdi. 7-iyuldan 12-iyulgacha bo‘lgan vaqt mobaynida 121 kishi jarohat olgan. Foto:Reuters
Portugaliyadagi o‘rmon yong‘inlarini o‘chirishga 1,7 mingga yaqin o‘t o‘chiruvchi va 500 dan ortiq texnika jalb etilgan. Foto: “TASS”
Yong‘inlar tufayli Portu va Lissabonni bog‘laydigan avtomagistral to‘sib qo‘yilgan. Leyriya chekkasida yong‘in turar joy binolariga yaqinlashib, turargohdagi bir nechta mashinani butunlay yaroqsiz va abgor holatga keltirdi. Foto: AP Photo
Mahalliy aholi yong‘inni to‘liq bartaraf etish uchun o‘t o‘chiruvchilar yetishmayotganidan shikoyat qilib, o‘zlarining shlanglaridan foydalangan holda yong‘inni o‘chirishga yordam bermoqda. Foto: AP Photo
Albergaria-a-Velya shahridagi yog‘ochni qayta ishlash zavodini yong‘in qamrab oldi. Foto: Getty Images
Xorvatiya
13-iyul kuni Xorvatiyada o‘rmon yong‘inlari boshlandi. Falokat maydoni 20 ming gektarga yaqin bo‘lib, yong‘inni bartaraf etishga 300 dan ortiq o‘t o‘chiruvchi va 85 ta texnika jalb etilgan. Olovni o‘chirish shamolning doimiy o‘zgaruvchan yo‘nalishi bilan murakkablashib bormoqda, bu esa yong‘inni to‘liq nazorat qilish imkonini qiyinlashtirmoqda. Hodisa oqibatida bir qancha uy va avtomobillar zarar ko‘rgan. Foto: AP Photo
Xorvatiyaning 3 ta tumanida yong‘in sodir bo‘ldi. Shibenik-Kninsk uyezdi yong‘in xavfsizligi boshqarmasi qo‘mondoni Darko Dukichning so‘zlariga ko‘ra, kuchli shamol tufayli yong‘in tez tarqalmoqda. Agar o‘t o‘chiruvchilar yong‘inni bartaraf eta olmasa, ular olov manbasi yonidan o‘tadigan magistralni to‘sib qo‘yishi aniq. Foto: AP Photo
Fransiya
Fransiyaning 23 ta hududida jazirama tufayli xavfning sariq darajasi joriy etildi. Suratda La-Rosh-Blansh hududidagi yonib ketgan dala. Foto: Reuters
Jandarmlarning xulosasiga ko‘ra, yong‘in o‘simliklari juda quruq bo‘lgan ushbu hududda qishloq xo‘jaligi texnikasidan foydalanish oqibatida kelib chiqqan bo‘lishi mumkin edi. Foto: Reuters
Ispaniya
Ispaniyaning aksariyat hududlarida haddan tashqari issiq ob-havo tufayli xavfning qizil darajasi e’lon qilindi. Ekstremadura hududida o‘rmon yong‘inlari 2,5 ming gektarga yaqin maydonni qamrab oldi. Foto: “TASS”
Portugaliya bilan chegarada ispaniyalik o‘t o‘chiruvchilar bir necha yuz qishloq aholisini evakuatsiya qildi va seshanba (12-iyul) kuni Salamanka provinsiyasini qamrab olgan yong‘inni o‘chirishda davom etmoqda. Foto: “TASS”
Ispaniya milliy meteorologiya xizmati matbuot kotibi Kayetano Torres so‘nggi oylarda jazirama to‘lqinlar va yomg‘irning kamligi yong‘inlar uchun ideal sharoit yaratganini aytdi. Foto: “TASS”
Izoh (0)