“Tinchlik — juda bebaho ne’mat”. Qoraqalpog‘iston musulmonlari qoziyati qozisi aholiga videomurojaat bilan chiqdi

Qoraqalpog‘iston musulmonlari qoziyati qozisi Shamsuddin Bahauddinov videomurojaat bilan chiqib, aholini provokatsiyaga berilmaslikka va tinchlikning qadriga yetishga chaqirdi.

“Payg‘ambarimiz Muhammad mustafo sallallohu alayhi vasallam o‘zining muborak hadislarida: Ikki ne’mat bor. Bu ikki ne’matning qadriga ko‘pchilik insonlar yetmaydi. Ularning birinchisi tan salomatligi bo‘lsa, ikkinchisi tinchlik ne’matidir, deya bayon etgan.

Azizlar, 1-2 kundan beri elimizda bo‘lib turgan voqealardan hammamizning xabarimiz bor. Shu maqsadda hurmatli prezidentimiz Nukusga kelib, nuroniylar, deputatlar bilan uchrashib, xalqimizning tilak-istaklarini eshitdi hamda bugungi kunda norozilik uyg‘otayotgan ba’zi bir masalalarga oydinlik kiritdi. Ya’ni O‘zbekiston Respublikasi Konstitutsiyasining 70, 71, 72, 74, 75-moddalarini amaldagi tahrirda o‘zgarishsiz qolishini ma’lum qildi.

Azizlar, tinchlik – bu juda ulkan, bebaho ne’mat. Uning qadriga yetish har birimizning vazifamiz. Tinchlikni saqlash, uning qadriga yetish payg‘ambar alayhissalom muborak hadislarida aytganlaridek, shu yurtda yashayotgan har bir fuqaroning, mo‘min-muslimalarning vazifalaridan”, — degan qozi Bahauddinov.