Transport vazirligi huzuridagi Fuqaro aviatsiyasi agentligi O‘zbekistonda yangi Panorama Airways aviakompaniyasi tashkil etilgani haqidagi xabarlarni rad etdi.
“Ommaviy axborot vositalarida O‘zbekistonda yangi Panorama Airways aviakompaniyasi tashkil etilgani va tez orada Airbus-320 va Boeing-777 samolyotlarida parvozlarni amalga oshirishi haqidagi xabarlar haqiqatga to‘g‘ri kelmaydi”, — deyiladi “O‘zaviatsiya” agentligi xabarida.
Ta’kidlanishicha, fuqaro aviatsiyasida havo kemalaridan foydalanish bilan bog‘liq bo‘lgan har qanday faoliyatni amalga oshirish uchun Havo kodeksining 44-moddasiga (ekspluatant sertifikatini berish) hamda Vazirlar Mahkamasining “O‘zbekiston Respublikasi fuqaro aviatsiyasida havo kemalari ekspluatanti sertifikatini berish tartibi to‘g‘risidagi nizom” talablariga muvofiq har qanday yuridik yoki jismoniy shaxs “O‘zaviatsiya” agentligidan belgilangan tartibda havo kemasi ekspluatanti sertifikatini olishi shart.
Faqatgina havo kemasi ekspluatanti sertifikatini olgandan keyingina aviakompaniya maqomini olish mumkin.
“O‘zini Panorama Airways aviakompaniyasi deb atayotgan tashkilot bugungi kunga qadar ‘O‘zaviatsiya’ agentligiga havo kemasi ekspluatanti sertifikatini olish uchun ariza va havo kemasini lizingga olgani haqidagi hujjatlarni taqdim etmagan. Shunday qilib, OAVda O‘zbekistonda shunday aviakompaniya tashkil etilgani haqida e’lon qilinayotgan xabarlar haqiqatga to‘g‘ri kelmaydi”, — deya ta’kidlanadi xabarda.
Eslatib o‘tamiz, 2019-yilning sentabrida Qanot Sharq Airlines xususiy kompaniyasi Superjet samolyotlariga shartnoma (yetkazib berish haqidagi bitimni nazarda tutadi) imzolagani haqida xabar berilgan edi. Aviakompaniya, shuningdek, Rossiyaning Sukhoi Civil Aircraft Company (SСАC) kompaniyasidan uchta Superjet 100 samolyotini lizingga olishni rejalashtirgandi.
Izoh (0)