Jizzax viloyatining Zarbdor tumanida ikki fuqaro o‘rtasida sodir bo‘lgan janjal oqibatida ulardan biri vafot etdi, deb xabar beradi viloyat IIB axborot xizmati.
Ma’lum qilinishicha, 19-iyun kuni soat 07:00 larda Zarbdor tumani “Taraqqiyot” mahallasida cho‘ponlik bilan shug‘ullanuvchi ikki nafar shaxs o‘zaro janjallashib qolgan. Xususan, 29 yoshli shaxs qoramollarini haydab ketish uchun ularni Bunyodkor ko‘chasida yashovchi 54 yoshli hamqishlog‘ining uyi oldiga to‘plagan.
Xonadon egasi cho‘ponga qoramollarni uyi oldidan haydashini talab qilgan va o‘rtada nizo kelib chiqqan.
Janjal davomida cho‘pon mahalladoshini yerga yiqitib, yuzi va bosh qismiga bir necha marta urgan. O‘z navbatida, kaltak yegan shaxs yonida bo‘lgan sumkasidan oshxona pichog‘ini chiqarib, cho‘ponning chap ko‘krak qismiga bir marotaba urib, tan jarohat yetkazgan.
Oqibatda og‘ir tan jarohatlari olgan cho‘pon tuman tibbiyot birlashmasida vafot etgan.
Holat yuzasidan Zarbdor tumani IIB Tergov bo‘limi tomonidan Jinoyat kodeksining tegishli moddasi bilan jinoyat ishi qo‘zg‘atilgan. Gumonlanuvchi protsessual tarzda ushlanib, vaqtincha saqlash xonasiga joylashtirilgan.
Avvalroq Shahrisabz shahridagi to‘yxonada erkak bir necha kishi tomonidan pichoqlangani, Samarqandda o‘g‘il o‘z otasi va akasini bolta bilan chopib tashlagani, Farg‘onada fuqaro ikki tanishini pichoqlagani to‘g‘risida xabar berilgandi.
Izoh (0)