“Dehqonobodda xonadonlarga ichimlik suvi quvuri tortilyapti, ammo tumanda santexnik yo‘q”. Zoir Aliqulov kasb-hunar maktablari ehtiyojdan kelib chiqib kadr tayyorlamayotganini aytmoqda
Qashqadaryo viloyatining Dehqonobod tumani hokimi Zoir Aliqulov tumanda yoshlar bandligini ta’minlash va kasb-hunar maktabi bitiruvchilarini ishga joylashtirish masalasida fikr bildirib, “Dehqonobodda deyarli barcha xonadonlarga ichimlik suvi quvuri tortilmoqda. Ammo bizda haligacha santexnik yo‘q”, dedi. Bu haqda hokim maktab bitiruvchilari bilan muloqotida gapirib, mas’ullarga taklif berganini aytib o‘tgan.
“Tumandagi kasb-hunar maktablari, kollejlar tuman uchun kerakli kadrni tayyorlasin. Masalan bugungi kunda tumanda aholi xonadonlariga ichimlik suvi quvurlari tortilmoqda. Har bir xonadonga toza ichimlik suvi kirib boryapti. Demak, aholida santexnik xizmatiga ehtiyoj bor. Lekin eng yomoni bizda santexnik yetarli emas. Holbuki, har yili kasb-hunar kollejlari va kasb-hunar maktablarini yuzlab yoshlar bitirmoqda. Lekin aksariyati ish topishda qiyinchilikka uchramoqda”, — dedi tuman hokimi.
Hokim hududdagi kasb-hunar maktablari tumandagi mavjud ish o‘rinlari uchun mutaxassis tayyorlab berishi kerakligini, shuningdek kasb-hunar maktabi bitiruvchilarini ishga olgan tashkilotlarga qo‘shimcha imtiyoz berilishi kerak degan taklifni o‘rtaga tashlagan.
“Kollej va kasb-hunar maktablarini tamomlagan yoshlarni ishga qabul qilgan korxona va tashkilotlarga qo‘shimcha imtiyozlar berish kerak. Masalan ish haqi, ijara to‘lovlarini to‘lash masalasida yengillik bersak, bunga qiziqish paydo bo‘ladi”, — degan tuman hokimi mazkur masalada fikr bildirar ekan.
Tuman hokimining aytishicha, hududdagi “Duob”, “Terakli”, “Oybek” va “Oqqishloq” mahalla fuqarolar yig‘inlari tuman markazidan 180—230 km uzoqlikda joylashgan, hudud yoshlari kasb-hunar egallash uchun uzoq masofadan tuman markaziga kelib o‘qish imkoniyatiga ega emas.
“Prezidentimizning 2019-yil 6-sentabrdagi farmoniga asosan ‘Duob’ mahallasida joylashgan quvvati 405 o‘rinli Dehqonobod xizmat ko‘rsatish kasb-hunar kolleji 50 o‘rinli yotoqxonasi bilan Qarshi muhandislik-iqtisodiyot institutiga ko‘p tarmoqli o‘quv markazlari va amaliyot poligonlarini tashkil etish uchun ajratib berilgan. Ammo uch yildan buyon Qarshi muhandislik-iqtisodiyot instituti binodan foydalanmagan. Bino bo‘sh turibdi. Binodan maqsadli foydalanish maqsadida kollej binosida kasb-hunar maktabi tashkil etilsa, hududdagi to‘rtta mahallada yashovchi kasb-hunar egallash istagida bo‘lgan yoshlarga qulaylik yaratilgan bo‘lar edi”, — deydi tuman hokimi mas’ullarga bergan takliflari haqida gapirar ekan.
Dehqonobod hokimining ma’lumot berishicha, 2020—2021-o‘quv yilida tumandagi umumiy o‘rta ta’lim maktablarini jami 2394 nafar o‘quvchi tamomlagan bo‘lib, shundan 438 nafari Oliy ta’lim muassasalariga, 264 nafari kasb-hunar maktablariga, 243 nafari kollejlarga o‘qish va kasb-hunar egallash uchun o‘qishga qabul qilingan.
“2021-yilda tumandagi kasb-hunar kollejlarini tamomlagan 384 nafar bitiruvchining 169 nafari yoki 44 foizi egallagan mutaxassisliklari bo‘yicha ishga joylashgan. Qolgan 56 foizi yoki 215 nafari boshqa sohada ishlashga majbur bo‘lmoqda. Keyingi uch-to‘rt yilda tumanda chorvachilikni rivojlantirishga alohida e’tibor qaratilganligi, tadbirkorlar tomonidan pista va kovrak plantatsiyalari tashkil etilganligi e’tiborga olinib, veterinariya, zootexnika, dorivor o‘simliklarni yetishtirish va qayta ishlash mutaxassisi, santexnik xizmati ko‘rsatuvchi yo‘nalishlarida kadrlar tayyorlansa maqsadga muvofiq bo‘ladi”, — dedi hokim.
Hokim shuningdek, muloqotda maktab bitiruvchilariga yaxshi o‘qib, kelajakda tumandagi mavjud ishlar uchun kerakli mutaxassis bo‘lib yetishishni taklif qilgan.
“Sizlarga o‘zimning hayotimdan misol keltirmoqchiman. Men ham 25 yil oldin xuddi Sizdek yosh bitiruvchi edim. Kechani kecha kunduzni kunduz demasdan o‘qidik. Kezi kelganda pul topish uchun ko‘chaga chiqdik. Endi Sizlar mustaqil hayotga birinchi qadamingizni qo‘ydingiz. Siz ertaga hokim, shifokor, prokuror, ichki ishlar xodimi bo‘lishingiz kerak. Orzu havas bilan maqsadlaringiz mushtarak bo‘lsin. O‘qing, izlaning, to‘xtab qolmang”, — degan tuman hokimi.
