Қатарда бўлиб ўтадиган Жаҳон Чемпионати олдидан Франция терма жамоасининг собиқ футболчиси Зинедин Зиданнинг ЖЧ—2006 финалида Марко Матераццига бош билан берган зарбасига бағишланган ёдгорлик ўрнатилади, дея хабар беради Goal.
Ҳайкалда франциялик собиқ футболчининг бош билан зарба бериш лаҳзаси тасвирланади.
Худди шундай ҳайкал аввал Қатарда мавжуд бўлган, бироқ 2013 йилда маҳаллий аҳолини хафа қилиши мумкинлиги инобатга олиниб, ёдгорлик олиб ташланган. Ҳозирда мамлакат расмийлари ҳайкал ўрнини ўзгартиришни режалаштирган ҳолда ушбу қарордан воз кечган.
Қатар музейлари раиси ал Майасса ат-Тани қарорни изоҳларкан, шундай дейди: «Жамиятда эволюция жараёнлари кечмоқда. Буни вақт талаб қилади, аввалига одамлар бирор нарсани танқид қилади, кейин эса тушунади ва кўникади. Зидан Қатарнинг ажойиб дўсти. Ва у араб дунёсида ибратли шахсдир. Санъат, қолган барча нарсалар каби, дид масаласи. Бизнинг мақсадимиз — одамларнинг имконият даражасини оширишдир».
Зидан ва Матерацци ўртасидаги мазкур зиддиятли вазият 2006 йилги мундиал финалида Франция ва Италия терма жамоалари ўртасидаги ўйиннинг 110-дақиқасида содир бўлган. Ўша вақтда Зидан италиялик ярим ҳимоячи томонидан айтилган ҳақоратли сўзларга чидай олмай, Матераццининг кўкрак қафасига боши билан зарба берган. Шундан сўнг Зидан бу иши учун майдондан четлатилади, италияликлар эса пенальтилар сериясида устун келиб, Жаҳон Чемпионатининг ғолибига айланганди. Аммо Зинедин ўйинда кўрсатган ножўя ҳаракатига қарамай турнирнинг энг яхши ўйинчиси деб топилган эди.
Изоҳ (0)