O‘zbekistonda dam olish kunlari qanday ob-havo kutilmoqda?

“O‘zgidromet” 4—5-iyun kunlari uchun ob-havo prognozini e’lon qildi.

Unga ko‘ra, shanba kuni ob-havoning beqarorligi faqat respublikaning sharqiy hududlarida saqlanib turadi. Tog‘oldi va tog‘li hududlarda, kechasi va ertalab Farg‘ona vodiysi viloyatlarida ba’zi joylarda qisqa muddatli yomg‘ir yog‘ishi, momaqaldiroq bo‘lishi mumkin. Respublikaning qolgan hududlarida quruq va kam bulutli ob-havo bo‘ladi. Markaziy va janubi-sharqiy viloyatlarning ayrim hududlarida ba’zi joylarda chang-to‘zonlari bilan shamolning kuchayishi kutilmoqda. Havo harorati 27-32 daraja atrofida bo‘ladi.

Yakshanba kuni respublikaning barcha hududlari bo‘yicha deyarli quruq va kam bulutli ob-havo bo‘ladi. Faqat ayrim tog‘oldi va tog‘li hududlarda qisqa muddatli yomg‘ir yog‘ishi mumkin. Kunduzi harorat 33-35 darajagacha, shimolda, janubda va cho‘l hududlarida 36-37 darajagacha ko‘tariladi.

3—4-iyunda tog‘oldi va tog‘li hududlarda sel-suv toshqin hodisalari yuzaga kelishi mumkin.

Eslatib o‘tamiz, “O‘zgidromet” 3—4-iyun kunlari ayrim hududlarda yomg‘ir, sel va kuchli shamol kuzatilishidan ogohlantirgandi.