O‘zbekiston yozda Rog‘un GESdan elektr energiya sotib olishni rejalashtirmoqda

O‘zbekiston va Tojikiston hukumatlari yoz davrida Rog‘un gidroelektrostansiyasi tomonidan ishlab chiqariladigan elektr energiyasini eksport qilishga oid memorandumni imzoladi. Bu haqda Energetika vazirligi “Daryo”ga ma’lum qildi.

Hujjat ikki davlat o‘rtasidagi do‘stona munosabatlarni teng huquqlilik va o‘zaro manfaatdorlik asosida mustahkamlash maqsadida imzolangan.

Tojikiston tomonining ma’lum qilishicha, hozirda Rog‘un GESning barcha agregatlarini bosqichma-bosqich ishga tushirish jarayoni davom etmoqda.

Elektr energiyasini yetkazib berish shartlari, rejimlari, hajmlari va tariflari joriy yil oxirigacha imzolanishi rejalashtirilgan elektr energiyasini xarid qilish bo‘yicha alohida shartnoma doirasida ko‘rib chiqiladi. Taxminan gap 10 yillik muddat uchun tuziladigan shartnoma haqida ketmoqda.

Rog‘un GES haqida

Rog‘un GES mamlakatdagi eng yirik ko‘lamli loyiha eng uzoq qurilgan loyiha ham hisoblanadi. GES uchun tayyorgarlik ishlari 1976-yilda boshlangan. To‘g‘on 1982-yildan 1991-yilgacha qurilgan. Uning qurilishi Sovet Ittifoqi parchalangandan so‘ng to‘xtatib qo‘yilgan. 2007-yilda Tojikiston hukumati stansiya qurilishini davom ettirishini ma’lum qilgan.