Andijonda yuk mashinasida 2 tonna iste’molga yaroqsiz noma’lum hayvon ichki a’zolari olib ketilayotgani aniqlandi

Andijonda 2 tonna iste’molga yaroqsiz noma’lum hayvon ichki a’zolari olib ketilayotgani aniqlanib, yo‘q qilindi.

IIV Jamoat xavfsizligi departamentining ma’lum qilishicha,  Andijon viloyati IIB JXX JTSB Karantin tadbirlarni ta’minlash bo‘linmasi hamda viloyat Veterinariya va chorvachilikni rivojlantirish bo‘limi xodimlari tomonidan YPX maskanlarida nazorat reyd tadbirlari o‘tkazilgan.

Reyd davomida Isuzu yuk mashinasida veterinariya-sanitariya qoidalariga zid ravishda, taxminan, 2 tonna og‘irlikdagi iste’molga yaroqsiz noma’lum hayvon ichki a’zolari olib ketilayotgani aniqlanib, o‘rnatilgan tartibda yo‘q qilish choralari ko‘rilgan.

Bundan avval Surxondaryodan Toshkentga noma’lum hayvonga tegishli go‘sht mahsulotlarini olib kelayotgan uchta avtomobil to‘xtatib qolingani, Jizzaxda Nexia yukxonasi va salonidan Toshkentga olib ketilayotgan 712 kilo noma’lum hayvon go‘shti topilgani, Buxorodan Toshkentga 500 kilo iste’molga yaroqsiz go‘sht olib ketayotgan Isuzu to‘xtatib qolingani haqida xabar berilgandi.