“O‘zbekgidroenergo”AJda kuzatuv kengashining yig‘ilishi bo‘lib o‘tdi

“O‘zbekgidroenergo” AJda 2022-yil I chorak moliyaviy xo‘jalik faoliyati yakunlari bo‘yicha ijro organining hisoboti, 2022-yilda amalga oshiriladigan ishlar, jamiyatda amalga oshirilayotgan transformatsiya jarayonlari va boshqa dolzarb masalalarga bag‘ishlangan kuzatuv kengashi yig‘ilishi bo‘lib o‘tdi.

Yig‘ilish kun tartibida 11 ta masala ko‘rib chiqildi. Yig‘ilishda jamiyat boshqaruv raisi Abdug‘ani Sanginov va mas’ul xodimlarning hisobotlari eshitilib, joriy yil I chorak yakunlari bo‘yicha quyidagi asosiy natijalarga erishilganligi ta’kidlab o‘tildi, jumladan:

• elektr energiyasi ishlab chiqarish rejasi — 120 foizga;
• investitsiya loyihalarini o‘zlashtirish rejasi — 101 foizga;
• mahalliylashtirish dasturi rejasi — 100 foizga;
• sanoat mahsulotlarini ishlab chiqarish rejasi — 244 foizga;
• sanoat kooperatsiyasi rejasi — 100 foizga bajarildi.

Shuningdek, yig‘ilishda Vazirlar Mahkamasining 2022-yil 29-apreldagi210-F son farmoyishi bilan tasdiqlangan “Yo‘l xaritasi”ga muvofiq, McKinsey & Company xalqaro konsalting kompaniyasi bilan hamkorlikda jamiyatda amalga oshirilayotgan transformatsiya jarayonlariga alohida to‘xtalib o‘tildi.

O‘z navbatida mazkur yig‘ilishda O‘zbekiston Respublikasi Prezidentining “Tadbirkorlik muhitini yaxshilash va xususiy sektorni rivojlantirish orqali barqaror iqtisodiy o‘sish uchun shart-sharoitlar yaratish borasidagi navbatdagi islohotlar to‘g‘risida” 2022-yil 8-apreldagi PF 101-son farmoni ijrosini ta’minlash maqsadida, jamiyat kuzatuv kengashi huzurida Strategiya va investitsiyalar qo‘mitasi, Audit qo‘mitasi, Tayinlovlar va haq to‘lash qo‘mitasi, Korrupsiyaga qarshi kurashish va etika qo‘mitasi tashkil etilib, qo‘mitalarning tarkibi va nizomlari tasdiqlandi.

Shu bilan birga, jamiyatning kelgusidagi reja ko‘rsatkichlari, xususan yarim yillik, to‘qqiz oy va yil yakuniga qadar bajariladigan dolzarb masalalar ham ko‘rib chiqildi. Kuzatuv kengashi tomonidan yil yakuniga qadar umumiy quvvati 258 mVt, qiymati 187 million dollar bo‘lgan 7 ta investitsiya loyihalarining o‘z vaqtida foydalanishga topshirilishi alohida nazoratga olinishi lozimligi ta’kidlab o‘tildi.

Reklama huquqi asosida.