Pekinda “Yangi O‘zbekistonning taraqqiyot strategiyasi” taqdimoti bo‘lib o‘tdi

Shanxay hamkorlik tashkilotining Pekindagi shtab-kvartirasida “Yangi O‘zbekistonning taraqqiyot strategiyasi” taqdimoti bo‘lib o‘tdi.

Tadbirda ishtirok etgan diplomatlar, ekspertlar va tadbirkorlar xitoy tilida chop etilgan “Yangi O‘zbekistonning 2022—2026-yillardagi taraqqiyot strategiyasi” kitobi bilan tanishgan. Muloqot davomida O‘zbekiston prezidenti Shavkat Mirziyoyev rahbarligi ostida amalga oshirilayotgan keng ko‘lamli islohotlar natijasida erishilgan yutuqlarga alohida e’tibor qaratilgan.

SHHT bosh kotibi Chjan Min o‘z chiqishi davomida O‘zbekistonning mintaqada tinchlik va barqarorlikni ta’minlash yo‘lidagi hissasini yuqori baholagan. U prezident Shavkat Mirziyoyev tarixiy islohotlarni amalga oshirayotganini ta’kidlagan. “O‘zbekistonning ochiq va faol tashqi siyosati jahon miqyosida mamlakat obro‘sining oshishiga va xalqaro, jumladan, SHHT doirasida hamkorlikni faollashtirishga xizmat qilmoqda”, — deydi u.

Xitoylik ekspertlar Shavkat Mirziyoyevning islohotlar dasturi bir tomondan mamlakatni modernizatsiya qilish, ikkinchi tomondan, o‘zbek xalqining tarixiy, ma’naviy va madaniy qadriyatlarini hisobga olish masalalarini o‘zida mujassam etgan kompleks yondashuv ekanini ta’kdilagan. Bundan tashqari, iqtisodiyotni jadal o‘zgartirish chuqur o‘ylangan ijtimoiy siyosat bilan amalga oshirilmoqda.

Xitoy Davlat kengashi huzuridagi Yevropa va Osiyo ijtimoiy rivojlanish instituti direktori Li Yunsyuanning qayd etishicha, O‘zbekistonda 2017-yilda boshlangan ilohotlar bugungi kunda aniq natijalarni bermoqda. Shavkat Mirziyoyevning islohotlar yo‘nalishi xalqaro hamjamiyatda keng e’tirof etilgan.

“Yangi O‘zbekiston taraqqiyot strategiyasi Harakatlar strategiyasining mantiqiy davomiga aylandi. Yangi taraqqiyot dasturida erishilgan o‘zgarishlar natijalari va mamlakatning bunyodkorlik salohiyatidan kelib chiqib belgilab berilgan yanada yuksak maqsadlar ko‘zlangan”, — deydi u.

Xitoy ijtimoiy fanlar akademiyasi qoshidagi Xitoy va Rossiya o‘rtasidagi strategik hamkorlik kengashi direktori o‘rinbosari Su Channing aytishicha, “so‘nggi 5 yil ichida O‘zbekistonda amalga oshirilgan iqtisodiy islohotlar sabab mamlakat Markaziy Osiyo eng barqaror davlatga va mintaqadagi iqtisodiy drayverga aylangan”.

Umuman olganda, “Yangi O‘zbekistonning taraqqiyot strategiyasi” taqdimoti Xitoy siyosiy va ekspert doiralari vakillarining O‘zbekistondagi zamonaviy islohotlarni chuqurroq anglash istagini ko‘rsatgan. Ularning fikricha, O‘zbekistondagi o‘zgarishlar Markaziy Osiyoda “barqarorlashtiruvchi rol o‘ynaydi”, ayniqsa, qo‘shni mintaqalarda va butun dunyoda keskinlik kuchayib borayotgan va oldindan aytib bo‘lmaydigan holatlar fonida.