Namangan xalqaro aeroportida zilzila va yong‘in tufayli yuzaga keladigan favqulodda vaziyatlar oqibatlarini bartaraf etish bo‘yicha o‘quv mashg‘uloti bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
O‘quv mashqi rejasiga ko‘ra, aeroport hududida yer silkinishi sodir bo‘ldi. Bu yerdagi xizmat binosidan odamlar tashqariga qochib chiqa boshladi. Ustiga ustak, binoda zilzila natijasida talafot sodir bo‘ldi va yong‘in kelib chiqdi.
Yuz bergan hodisa haqida zudlik bilan tegishli xizmatlar hamda viloyat Favqulodda vaziyatlar va Sog‘liqni saqlash boshqarmalariga xabar berildi.
Aeroport qutqaruv xizmati xodimlari yong‘inni o‘chirish va boshqa hududlarga tarqalib ketishining oldini olish maqsadida birinchi choralarni ko‘rdi. Ular tomonidan elektr va gaz tarmoqlari uzildi.
Viloyat FVB xodimlari aeroportning favqulodda vaziyat sodir bo‘lgan hududiga yetib kelib, yong‘inni bartaraf yetishda aeroport qutqaruv xodimlariga yordam berdi.
Birgalikdagi harakatlar natijasida bino ichida qolib ketgan xodimlar qutqarildi va tibbiyot xodimlariga topshirildi. Ular qutqarilgan shaxslarga birinchi yordam ko‘rsatdi, og‘ir tan jarohati olganlar esa shifoxonaga jo‘natildi.
O‘quv mashqi yakunida turli tuzilmalarning favquloddagi vaziyat chog‘idagi harakatlari batafsil tahlil qilindi va mashg‘ulotning kechishi qoniqarli baholandi.
Izoh (0)