Toshkentda moliyaviy piramida tashkil qiligan “Realnaya Investitsiya” MCHJ rahbari ushlandi. Bu haqda “Fakt 24” informatsion dasturida ma’lum qilindi.
Qayd etilishicha, Davlat xavfsizlik xizmatining Toshkent shahar bo‘yicha boshqarmasi va Iqtisodiy jinoyatlarga qarshi kurashish departamentining shahar boshqarmasi xodimlari tomonidan tezkor tadbir o‘tkazilgan. Unda o‘zini treyderlik faoliyati bilan shug‘ullanayotganini ma’lum qilib, fuqarolarning ishonchiga kirgan va ularning shaxsiy mablag‘larini noqonuniy o‘zlashtirib kelgan mas’uliyati cheklangan jamiyat faoliyatiga chek qo‘yilgan.
Xususan, muqaddam sudlangan shaxs (1995-yilda Samarqand viloyatida tug‘ilgan) 2020-yilda Toshkent shahrida “Realnaya Investitsiya” MCHJni tashkil etgan. Mijozlar topish maqsadida Telegram messenjerida hamda Instagram ijtimoiy tarmog‘ida guruh ochib, targ‘ibot ishlari olib borgan.
Jamiyat rahbari mijozlardan 15 ming dollardan 200 ming dollargacha bo‘lgan miqdorda pul mablag‘larini qabul qilib olgan. Ularga har oyda kamida 10 foizdan foyda berishni va’da qilib, ushbu foydani yangi jalb qilingan fuqarolarning pul mablag‘lari hisobidan to‘lab kelgan.
Jamiyat rahbarining aytishicha, u faoliyati davomida 500 tadan ortiq fuqaro bilan oldi-berdi qilgan va bugungi kunda 2,5—3 million dollar atrofida qarzi bor. U noqonuniy yo‘l bilan topilgan daromadlarini bir nechta ko‘chmas mulklar va qimmatbaho avtomashinalar xarid qilish orqali legallashtirgan.
Hozirda holat yuzasidan mas’uliyati cheklangan jamiyat rahbari va boshqalarga nisbatan jinoyat ishi qo‘zg‘atilgan.
Mavzuga doir:
- Qashqadaryolik fuqaro moliyaviy piramida tashkil qilib, 231 nafar fuqaroning 13,7 mlrd so‘m pulini o‘zlashtirdi
- Chinozda moliyaviy piramida tuzgan yana bir “Ahmadboy” ushlanib, qamoqqa olindi
- Toshkentda yiliga 260 foizgacha foyda ko‘rishni va’da qilib, moliyaviy piramida tashkil qilganlar qo‘lga olindi
Izoh (0)