Shavkat Mirziyoyev va Rajab Toyyib Erdo‘g‘on o‘zlari bilan birga suratga tushishni istagan sayyohning taklifini qabul qildi

Shavkat Mirziyoyev va Turkiya prezidenti Rajab Toyyib Erdo‘g‘on 30-mart kuni Xiva shahriga tashrifi chog‘ida o‘zlari bilan birga suratga tushishni istagan sayyohning taklifini qabul qildi. Ushbu holat “Menimcha” ko‘rsatuvida namoyish etildi.

Prezidentlar Xiva shahridagi majmualarni aylanib ko‘rdi.

“Bitta Xivaning o‘zida 130 ta madrasa bo‘lgan. Ana madaniyat, ilm qanday rivojlangan. Xorazm shohi dunyodan ilm izlagan”, — dedi Shavkat Mirziyoyev.

Rajab Toyyib Erdo‘g‘on “ilmni bu yerdan eksport qilishganini” aytdi. “Shuning uchun ham bekorga bu yurtni ota yurt deb nomlashmaydi”, — dedi Turkiya prezidenti.

Prezidentlar majmualarni ko‘rish davomida xorijlik sayyohlar bilan ham suhbatda bo‘ldi. Ulardan biri ikki mamlakat yetakchilari bilan suratga tushish istagini bildirdi. Prezidentlar esa bu taklifni qabul qildi. Shavkat Mirziyoyev sayyohga sog‘lik-salomatlik tiladi.

Turk mehmonlari orasidagi O‘zbekiston tarixiga avvaldan mahliyo bo‘lgan madaniyat, ilm-fan vakillari ham dildagilarini gapirishdi.

“40 yildan beri Xivaga kelish mening orzum edi. Sizning soyangizda bugun shu orzumga yetdim. Men Xorazmning markazidaman, yana nima tilashim mumkin?!”, — dedi turk madaniyat vakillaridan biri O‘zbekiston prezidentiga.

“Tashakkur sizga. Tarixni chuqur bilasiz ekan. Qardoshim (Rajab Toyyib Erdo‘g‘on) ham bekorga kelgani yo‘q”, — dedi Shavkat Mirziyoyev unga.