Шавкат Мирзиёев ва Туркия президенти Ражаб Тоййиб Эрдўғон 30 март куни Хива шаҳрига ташрифи чоғида ўзлари билан бирга суратга тушишни истаган сайёҳнинг таклифини қабул қилди. Ушбу ҳолат «Менимча» кўрсатувида намойиш этилди.

Президентлар Хива шаҳридаги мажмуаларни айланиб кўрди.

«Битта Хиванинг ўзида 130 та мадраса бўлган. Ана маданият, илм қандай ривожланган. Хоразм шоҳи дунёдан илм излаган», — деди Шавкат Мирзиёев.

Ражаб Тоййиб Эрдўғон «илмни бу ердан экспорт қилишганини» айтди. «Шунинг учун ҳам бекорга бу юртни ота юрт деб номлашмайди», — деди Туркия президенти.

Президентлар мажмуаларни кўриш давомида хорижлик сайёҳлар билан ҳам суҳбатда бўлди. Улардан бири икки мамлакат етакчилари билан суратга тушиш истагини билдирди. Президентлар эса бу таклифни қабул қилди. Шавкат Мирзиёев сайёҳга соғлик-саломатлик тилади.

Турк меҳмонлари орасидаги Ўзбекистон тарихига аввалдан маҳлиё бўлган маданият, илм-фан вакиллари ҳам дилдагиларини гапиришди.

«40 йилдан бери Хивага келиш менинг орзум эди. Сизнинг соянгизда бугун шу орзумга етдим. Мен Хоразмнинг марказидаман, яна нима тилашим мумкин?!», — деди турк маданият вакилларидан бири Ўзбекистон президентига.

«Ташаккур сизга. Тарихни чуқур биласиз экан. Қардошим (Ражаб Тоййиб Эрдўғон) ҳам бекорга келгани йўқ», — деди Шавкат Мирзиёев унга.