Ijtimoiy tarmoqlarda Xorazm viloyati Urganch shahrida 31-mart kuni reklama monitorida pornografik video qo‘yib yuborilgani haqida xabarlar tarqalgandi. 2-aprel kuni reklama monitorida pornografik video joylashtirgan erkak sudlandi. Bu haqda Xorazm viloyat sudlari axborot xizmati xabar berdi.
Jinoyat ishlari bo‘yicha Urganch shahar sudi tomonidan 1978-yilda tug‘ilgan I.I.ga nisbatan ma’muriy ish ko‘rib chiqilgan. U xususiy korxonada haydovchi lavozimida ishlab, qo‘shimcha ravishda korxonaga tegishli monitorlarga reklama joylash vazifasini bajarib kelgan.
31-mart kuni I.I. Urganch shahrining al-Xorazmiy va Xonqa ko‘chasi chorrahasida o‘rnatilgan reklama monitoriga 20 tadan ortiq videomaterialni joylagan va monitorda pornografik mazmundagi video namoyish etilishiga sababchi bo‘lgan.
Sud huquqbuzarning ko‘rsatmasi, ishga doir hujjatlarni o‘rganib qaror qildi. Unga ko‘ra I.I. Ma’muriy javobgarlik to‘g‘risidagi kodeksning 189-moddasida (pornografik mahsulotni tayyorlash, olib kirish, tarqatish, reklama qilish, namoyish etish) ko‘rsatilgan huquqbuzarlikni sodir etgan deb topildi va bazaviy hisoblash miqdorining 50 baravari (13 million 500 ming so‘m) miqdorida jarimaga tortildi. Videomateriallarni monitorga joylashda foydalanilgan telefon va simsiz internet tarmog‘iga ulanish apparati davlat foydasiga musodara qilindi.
Izoh (0)