Ijtimoiy tarmoqlarda Samarqanddagi xususiy bog‘chalardan birida tarbiyalanuvchi bola kaltaklangani haqida xabarlar tarqaldi. Samarqand viloyati IIB holatga munosabat bildirib, hozirda tergovga qadar tekshiruv harakatlari olib borilayotganini ma’lum qildi.
Ma’lum qilinishicha, 24-mart kuni Samarqand shahar Sug‘diyona maskanida yashovchi fuqaro I.Sh. 2019-yilda tug‘ilgan farzandini Samarqand tumanidagi Baby Land (Kids academy) nomli xususiy bolalar bog‘chasidan uyiga olib kelganida, tanasining turli joylarida tilingan jarohatlar borligini ko‘rgan.
31-mart kuni fuqaro I.Sh. Samarqand tumani IIB boshlig‘i nomiga ariza bilan murojaat qilib, bog‘cha tarbiyachisi D.I.ga nisbatan qonuniy chora ko‘rishni so‘ragan.
Samarqand viloyat Maktabgacha ta’lim boshqarmasi ma’lumotlariga ko‘ra, Baby Land (Kids academy) nodavlat maktabgacha ta’lim tashkiloti Vazirlar Mahkamasi huzuridagi Ta’lim sifatini nazorat qilish davlat inspeksiyasi tomonidan 2020-yil 09-mart kuni “Behruzjon Intelekt” xususiy korxonasi tomonidan nodavlat MTTni tashkil etish bo‘yicha litsenziya asosida faoliyat olib bormoqda.
Hozirda holat yuzasidan Samarqand tumani IIB xodimlari tomonidan tergovga qadar tekshiruv harakatlari olib borilmoqda. Tarbiyachi D.I.ning arizasi asosida tadbirkor o‘rtasida tuzilgan mehnat shartnomasi bekor qilingan.
Avvalroq Samarqandda bolalarni igna tiqib qo‘rqitgan xususiy bog‘cha tarbiyachisiga nisbatan jinoyat ishi qo‘zg‘atilgan edi.
Izoh (0)