Ижтимоий тармоқларда Самарқанддаги хусусий боғчалардан бирида тарбияланувчи бола калтаклангани ҳақида хабарлар тарқалди. Самарқанд вилояти ИИБ ҳолатга муносабат билдириб, ҳозирда терговга қадар текширув ҳаракатлари олиб борилаётганини маълум қилди.
Маълум қилинишича, 24 март куни Самарқанд шаҳар Суғдиёна масканида яшовчи фуқаро И.Ш. 2019 йилда туғилган фарзандини Самарқанд туманидаги Baby Land (Kids academy) номли хусусий болалар боғчасидан уйига олиб келганида, танасининг турли жойларида тилинган жароҳатлар борлигини кўрган.
31 март куни фуқаро И.Ш. Самарқанд тумани ИИБ бошлиғи номига ариза билан мурожаат қилиб, боғча тарбиячиси Д.И.га нисбатан қонуний чора кўришни сўраган.
Самарқанд вилоят Мактабгача таълим бошқармаси маълумотларига кўра, Baby Land (Kids academy) нодавлат мактабгача таълим ташкилоти Вазирлар Маҳкамаси ҳузуридаги Таълим сифатини назорат қилиш давлат инспекцияси томонидан 2020 йил 09 март куни «Беҳрузжон Интелект» хусусий корхонаси томонидан нодавлат МТТни ташкил этиш бўйича лицензия асосида фаолият олиб бормоқда.
Ҳозирда ҳолат юзасидан Самарқанд тумани ИИБ ходимлари томонидан терговга қадар текширув ҳаракатлари олиб борилмоқда. Тарбиячи Д.И.нинг аризаси асосида тадбиркор ўртасида тузилган меҳнат шартномаси бекор қилинган.
Аввалроқ Самарқандда болаларни игна тиқиб қўрқитган хусусий боғча тарбиячисига нисбатан жиноят иши қўзғатилган эди.
Изоҳ (0)